Աշխատանքի եւ սոցիալական հարցերի փոխնախարար Դավիթ Խաչատրյանն այսօր ԱԺ աշխատանքի եւ սոցիալական հարցերի հանձնաժողովի նիստում քննարկման ներկայացրեց «Պետական նպաստների մասին» օրենքում փոփոխություններ եւ լրացումներ կատարելու նախագիծը, որով հիմնականում հստակեցումներ են իրականացնում այն հոդվածներում, որոնք պրակտիկայում տարընկալումների տեղիք էին տալիս:
«Փոփոխություն ենք կատարում խորը աստիճանի սահմանափակումով կամ ֆունկցիոնալության ծանր աստիճանի սահմանափակումով անձանց մասով տերմինների, առաջին եւ երկրորդ խմբի հաշմանդամություն տերմինն էր գործում, բայց օրենքի փոփոխությունից հետո այստեղ պիտի համապատասխանեցնենք: Հստակեցնում ենք երեխայի ծննդյան միանվագ նպաստ նշանակելու պայմանները օտարերկրացիների համար, օտարերկրյա պետություններում դիվանագիտական ծառայողների երեխաների ծննդյան հետ կապված որոշակի պայմաններ ենք փոխում՝ կապված նպաստի հետ: Երեխային մանկատուն հանձնելուց առաջ եթե ծնողին վճարված էր լինում երեխայի ծննդյան միանվագ նպաստը, ապա բռնագանձման գործընթաց այլեւս չենք իրականացնի»,- մանրամասնեց Դավիթ Խաչատրյանը:
Քննարկվեց նաեւ «Աշխատանքային օրենսգրքում» փոփոխությունների նախագիծը: Փոխնախարար Ռուբեն Սարգսյանն ասաց, որ նախագծով հեռավար աշխատանքի սկզբունքներն են մշակել. «Հեռավար աշխատանք հնարավոր է իրականացնել գործատուի եւ աշխատողի փոխադարձ համաձայնությամբ, եթե աշխատանքի բնույթը թույլ է տալիս այն հեռավար իրականացնել: Եթե հեռավար աշխատողը այլ երկրում լինի եւ գա իր հիմնական աշխատանքի վայր, դա չպետք է համարվի գործուղում եւ ծախսերը չպետք է փոխհատուցվի: Այլ բան է, որ գործատուն ու աշխատողը փոխհամաձայնության են գալիս»:
Բացառություն սահմանվեց նաեւ այն դեպքերի համար, երբ աշխատողն օտարերկրացի է ու Հայաստան գալու դեպքում կեցության ծախսեր են պահանջվելու:
Կարդացեք նաև
Հռիփսիմե ՋԵԲԵՋՅԱՆ