Aravot.am-ը Հովհ. Թումանյանի անվան տիկնիկային թատրոնի գեղարվեստական ղեկավար, ռեժիսոր Ռուբեն Բաբայանից հետաքրքրվեց՝ ինչպե՞ս է գնահատում Ամենայն Հայոց Կաթողիկոսի ամանորյա ուղերձը Հ1-ով եթեր չհեռարձակելու որոշումը: «Ես ավելի կողմնակից եմ բովանդակային գնահատականների, այլ ոչ թե ձեւական: Կարծում եմ, որ երկու կողմից էլ զուտ ձեւական բնույթի որոշումներ են կայացվել: Մի կողմից, ինչքան հասկացա՝ չէ, անպայման դա պետք է լինի «Լրաբերի» ժամանակ, մյուս կողմից էլ՝ չէ, եթե պետք է «Լրաբերի» ժամանակ լինի, ուրեմն ընդհանրապես պետք չէ… Իմ կարծիքով, եթե այդքան բարձր էր գնահատվում խոսքը, պետք էր այն տեղ հասցնել», – ասաց պարոն Բաբայանը:
Ապա հավելեց. «Չեմ կարծում, թե իրականում երկու կողմերից որեւէ մեկը շահեց դրանից»:
Մեր դիտարկմանը, որ ավանդաբար Վեհափառ Հայրապետի խոսքը նախորդել է երկրի ղեկավարի խոսքին, Ռուբեն Բաբայանն այսպես արձագանքեց. «Իսկապես ավանդաբար այդպես է եղել , բայց դա իր իմաստով որեւէ բան չի նշանակում, որովհետեւ ե՛ւ կաթողիկոսներ են տարբեր եղել, ե՛ւ ղեկավարներ… Այս պատմության մեջ ամենածիծաղելին այն է, որ նրանք ովքեր ասում էին՝ Հ1 ընդհանրապես չեն նայում, սկսեցին բողոքել, թե ինչու կաթողիկոսը Հ1-ով ելույթ չի ունեցել…
Ախր այնքան լուրջ հարցեր կան, որ չարժի հատուկ սրել նման հարցերը՝ ե՛ւ իշխանական բուրգի, ե՛ւ եկեղեցու կողմից: Չեմ կարծում, թե իմաստուն որոշում է կայացվել երկու կողմից էլ: Եթե եկեղեցու համար կարեւորը կաթողիկոսի ելույթն էր, կարելի էր համաձայնել «Լրաբերի» ժամանակ հնչեր, եթե իշխանության համար կարեւորը հասարակության համախմբումն էր, կարելի էր թույլ տալ՝ այդ ավանդույթը պահպանել: Երկու կողմից էլ սխալ քայլ են արել»:
Կարդացեք նաև
Գոհար ՀԱԿՈԲՅԱՆ
Ակունք իմաստության