Բանկերում եւ վարկային կազմակերպություններում կատարված խարդախության դեպքերով տուժած քաղաքացիներն այսօր բողոքի ցույց անցկացրեցին Հակակոռուպցիոն կոմիտեի շենքի դիմաց։
«Հանրային վերահսկողություն» ՀԿ ղեկավար Մհեր Կարագյոզյանն ասաց, որ առկա են կոռուպցիոն տարրեր, եւ իրենք ակնկալում են ընդունելություն Հակակոռուպցիոն կոմիտեում։ «Եկել ենք այստեղ՝ տեղեկացնելու, որ բանկերում տեղի է ունեցել զեղծարարություն, երկրում առկա է կողոպուտ, թալան։ Ուզում ենք այստեղ հիմնավորումներ ներկայացնել, որ առկա են կոռուպցիոն տարրեր»,- ասաց նա։
Ըստ Կարագյոզյանի՝ քաղաքացիների անձնական տվյալների ոչ միայն գաղտնիությունը, այլ նաեւ այդ տվյալների պաշտպանությունը բանկերի եւ պետական մարմինների պարտականության տիրույթում է։
«Տեւական ժամանակ բանկերի կողմից իրականացվել է քարոզչություն, որ քաղաքացիներ, մի տվեք ձեր անձնական տվյալները։ Այսինքն՝ մեղքը բարդել են քաղաքացիների վրա։ Դա բերել ու հանգեցրել է այն վիճակին, որ հանցագործությունները մինչեւ էսօր չեն կասեցվել։ Մենք կասկածներ ունենք, որ այստեղ առկա է բանկերի շահագրգռվածությունը, կարող են լինել նաեւ կոռուպցիոն տարրեր։ Կոռուպցիոն տարրերը հատկապես ուրվագծվում են հետեւյալ դեպքերում։ Մենք ունենք քաղաքացիներ, որոնց անունով վարկերն են վերցվել, փոխանցվել են հաշվեհամարին, հետագայում երկրորդ քաղաքացու անունով է վարկ վերցվել, փոխանցվել է նույն հաշվեհամարին։ Եթե առաջին դեպքում պետական մարմինը քրեական գործ է նախաձեռնել, այդ հաշվեհամարն ինչո՞ւ չի փակվել, ինչու չի սառեցվել, որ նմանատիպ հանցագործության դեպքում նորից նույն հաշվեհամարն է օգտագործվել»,- ասաց Կարագյոզյանը։
Կարդացեք նաև
Հակակոռուպցիոն կոմիտեում քննարկման հրավիրեցին բողոքող քաղաքացիների ներկայացուցիչներին։
Այսօր քաղաքացիները բողոքի ցույց էին արել նաեւ Կենտրոնական բանկի շենքի մոտ։
Ռոզա ՀՈՎՀԱՆՆԻՍՅԱՆ
Լուսանկարը՝ «Հանրային վերահսկողություն» ՀԿ էջից
