«21-րդ դարի ամենառասիստական, պետականորեն հովանավորված հանցագործությունն իրականացրել է Ադրբեջանը 2023 թվականին։ Այդ օրերին, Ադրբեջանը գործադրեց իր բանակը՝ կազմակերպելու համար հայերի էթնիկ զտում իր տարածքից։ Ընդամենը մեկ շաբաթում 100.000 հայեր լքեցին Լեռնային Ղարաբաղը։ Այսօր այնտեղ հայեր չկան», – ԵԱՀԿ-ում կայացած «Հավելյալ մարդկային հարթակի» երրորդ ժողովի ժամանակ այս մասին հայտարարել է Հայաստանում գործող «Իրազեկ քաղաքացիների միավորման» համակարգող Դանիել Իոաննիսյանը։
Իոաննիսյանի հավաստմամբ՝ դա 1988-ին Ադրբեջանում սաղմնավորված քաղաքականության վերջնական ակտն էր։ Իրավապաշտպանը հարկ է համարել շեշտել, որ Հայաստանը լքած ադրբեջանցիները երբեւէ բռնության չեն ենթարկվել։
Ադրբեջանի բռնապետը, ինչպես Իոաննիսյանը կոչեց Իլհամ Ալիեւին, հովանավորել է հայատյացությունն Ադրբեջանում։
«2012 թվականին Ալիեւը ներում շնորհեց եւ պարգեւատրեց Ռամիլ Սաֆարովին, որը Բուդապեշտում ընթացող ՆԱՏՕ–ի վարժանքների ժամանակ սպանել էր քնած հայ սպային։ 2016 թվականին Ալիեւը պարգեւատրեց մի ադրբեջանցի զինծառայողի, որը գլխատել էր հայ զինվորի՝ հպարտորեն լուսանկար հրապարակելով այդ տեսարանից սոցիալական մեդիայում», – փաստել է Դ․ Իոաննիսյանը։
Կարդացեք նաև
Հայ իրավապաշտպանը հիշեցրել է նաեւ, որ ըստ նախագահ Ալիեւի՝ հայերը մարդ չեն, շներ են։
«Անկախ քաղաքացիությունից, եթե հայկական ազգանուն ես կրում, ժամանի՛ր Բաքվի օդանավակայան, եւ ականատես կլինես ռասիզմին իր ամբողջ հմայքով», – ընդգծել է Դանիել Իոաննիսյանը։
Համեմատությամբ, նա փաստել է, որ ադրբեջանցիները կարող են ազատորեն երգել Երեւանի կենտրոնական հրապարակում՝ հղում կատարելով տարեսկզբին արձանագրված դեպքին։
Դանիել Իոաննիսյանի ելույթի ամբողջական տեքստը՝ ստորև:
«Ցավոք, ռասիզմը դեռևս իրողություն է ԵԱՀԿ անդամ որոշ երկրներում։ Բայց 21-րդ դարի՝ պետության մակարդակով կազմակերպված ամենառասիստական հանցագործությունը կատարվել է Ադրբեջանի կողմից 2023 թվականի սեպտեմբերին: Այդ օրերին Ադրբեջանն օգտագործեց իր զինուժը՝ իր տարածքում էթնիկ զտումներ կազմակերպելու համար։
Ընդամենը մեկ շաբաթվա ընթացքում 100.000 հայ լքեց Լեռնային Ղարաբաղը, և այժմ այնտեղ ոչ մի հայ չի մնացել։ Եվ դա Ադրբեջանի` տասնամյակներ տևած պետական քաղաքականության վերջնական գործողությունն էր։
Ըստ Ադրբեջանի պետական վիճակագրական կոմիտեի պաշտոնական տվյալների՝ 40 տարի առաջ Ադրբեջանում ապրող կես միլիոն հայերից այժմ այնտեղ մնացել է ընդամենը 200-ը։ Ոչ թե 200,000, այլ ընդամենը 200 մարդ:
Ամեն ինչ սկսվեց 1988 թվականին Սումգայիթում հայերի ջարդով, որին հաջորդեցին Կիրովաբադում, Բաքվում, Մարաղայում և Ադրբեջանի այլ քաղաքներում իրականացված ջարդերը։
Կան զոհերի ճշգրիտ անուններ և ցուցակներ։ Հայաստանում 35 տարի առաջ առանց բռնության հեռացած ադրբեջանցիների հետ նման բան երբեք չի պատահել։
Ադրբեջանի բռնապետ Իլհամ Ալիևը լիովին աջակցում է այս հայատյացությանը։ Մի քանի օրինակ բերեմ։
2012 թվականին Ալիևը ներում շնորհեց և պարգևատրեց Ռամիլ Սաֆարովին, որը Բուդապեշտում ՆԱՏՕ-ի զորավարժությունների ժամանակ սպանել էր քնած հայ զինվորին։ 2016 թվականին Իլհամ Ալիևը պարգևատրեց ադրբեջանցի զինծառայողի, որը գլխատել էր հայ զինվորի մարմինը և հպարտությամբ սոցցանցերում հրապարակել կտրած գլխի լուսանկարը՝ մի գործելաոճ, որն այժմ շատ տարածված է ադրբեջանցի զինվորականների շրջանում:
Մի քանի տարի առաջ իր համազգային ուղերձում նախագահ Ալիևը հայտարարել էր. «Մենք նրանց (հայերին) քշում ենք շների պես: Ադրբեջանցի զինվորները շների պես քշում են նրանց»։
Ադրբեջանցի պատգամավորը խոսում է հայերի «վերաինտեգրման» մասին։ Դա ինչ-որ առումով ծիծաղելի է։ Հայերի՞, թե՞ շների «վերաինտեգրում» են ուզում։ Ըստ իրենց նախագահի՝ հայերը շներ են։
Ադրբեջանի հայատյաց պետական քաղաքականությունը արձանագրվել է մի շարք հայտնի միջազգային կազմակերպությունների կողմից։ Պարզապես փորձեք Բաքվի օդանավակայան ժամանել հայկական ազգանունով՝ անկախ ձեր քաղաքացիությունից, և ականատես կլինեք ռասիզմի ողջ պերճանքին։
Հայաստանում էթնիկ ադրբեջանցիները կարող են առանց խնդրի մեր մայրաքաղաքի կենտրոնական հրապարակում երգել իրենց երգերը, ինչը տեղի է ունեցել այս տարի Ամանորի տոնակատարությունների ժամանակ։
Տիկնայք և պարոնայք,
Կցանկանայի օգտվել առիթից՝ բոլորիդ հրավիրելու Ադրբեջանում հայատյացության թեմայով հարակից միջոցառմանը, որը տեղի կունենա վաղը՝ ժամը 13:15-ին, 531 դահլիճում»:
Արսեն ԱՅՎԱԶՅԱՆ
