Այսօր ՀՀ հակակոռուպցիոն դատարանում դատական նիստի ավարտից հետո լրագրողները Գյումրու քաղաքապետ Վարդան Ղուկասյանից կարծիք հարցրեցին Նիկոլ Փաշինյանի այն հայտարարության վերաբերյալ, որ եթե ՔՊ-ն Ազգային ժողովի առաջիկա ընտրություններում սահմանադրական մեծամասնություն չկազմի, ապա սեպտեմբերին պատերազմ կլինի։
Վարդան Ղուկասյանը հարցին պատասխանեց բավական դժվարությամբ, քանի որ ոստիկանները քաշում էին նրա թևերից՝ չթույլատրելով միտքն ավարտին հասցնել։
«Գնացինք, Ղուկասյան»,- հրամայական տոնով ասում էր ոստիկաններից մեկը։
Վարդան Ղուկասյանն այնուամենայնիվ իր ասելիքը փոխանցեց․ «Երիտթուրքերը այդ սկզբունքով էին առաջնորդվում, այսինքն՝ խաղաղության, և դրանից հետո եղեռն կազմակերպվեց։
Հետո Նիկոլ Փաշինյանի խաղաղությունը…»։
Կարդացեք նաև
Վարդան Ղուկասյանի խոսքը կիսատ մնաց, քանի որ նրան շրջապատած ոստիկաններից մեկը բռնեց նրա ձեռքից՝ պնդելով՝ գնացինք։ Սա զայրացրեց Վարդան Ղուկասյանին, որն ասաց․ «Քաշի ձեռքերդ» ու շարունակեց խոսքը․ «Հասկացա՞ր, Նիկոլ Փաշինյանը երաշխիք չի կարող հանդիսանալ»։
Ոստիկանները, սա լսելով՝ ավելի ուժգին պնդեցին․ «Գնացինք»։ Վարդան Ղուկասյանն ասաց․ «Էնպես ես խառնվել, ոնց որ հորդ տունն է»։
Ոստիկաններից մեկը բարձրացրեց ձայնը․ «Ղուկասյան, գնացինք»։
«Գնացինք»,- ավելի բարձր արձագանքեց Վարդան Ղուկասյանը՝ հագնելով պիջակը ու լրագրողի հետ զրույցը դարձյալ շարունակելով։
«Նրա խոսքերը (նկատի ունի Նիկոլ Փաշինյանին) ասնավանի չէ»,- ասաց Վարդան Ղուկասյանը։
Ի՞նչ պիտի անի քաղաքացին՝ հետաքրքրվեցին նրանից, Վարդան Ղուկասյանը պատասխանեց․ «Քաղաքացին պետք է գնա, ՔՊ-ին դեմ քվեարկի, հաջողություն»։
Նունե ԱՐԵՎՇԱՏՅԱՆ
