Ֆրանսիայի նախագահ Էմանուել Մակրոնը այսօր հանդես է եկել ժողովրդին ուղղված ուղերձով։
Միջազգային լրատվականները հաղորդում են, որ ութ րոպե տևած ելույթի ընթացքում Մակրոնը դատապարտել է ցուցարարների կողմից բռնությունը։
Նա հայտարարել է, որ նրանք, ովքեր ջարդել և թալանել են ուրիշների սեփականությունը, կանգնելու են դատարանի առաջ և հատուցելու են իրենց պատճառած վնասը։
Որպես անկարգությունների կազմակերպիչներ՝ Մակրոնը նշել է «արմատական ծայրահեղ ձախերի ապստամբներին, որոնց միացել են բազմաթիվ քրեական տարրեր»։
Կարդացեք նաև
Մակրոնը խոստացել է, որ ավերված խանութների և սրճարանների սեփականատերերը փոխհատուցում կստանան։
Միևնույն ժամանակ, Մակրոնի խոսքով, անհրաժեշտ է տարբերակել խուլիգաններին նրանցից, ովքեր փողոց են դուրս եկել՝ իրենց օրինական պահանջներն արտահայտելու համար։ Նա ընդունել է, որ ցուցարարների դժգոհությունն արդարացված է, իսկ Ֆրանսիան հայտնվել է բարդ իրավիճակում, հատկապես սոցիալական ոլորտում։
«Երիտասարդներն ասում են՝ մեզ սպասվող ապագան այն չէ, ինչ մենք ուզում ենք», – նշել է Մակրոնը՝ հավելելով. «Մենք պետք է լսենք զայրացած մարդկանց»։
Մակրոնն ընդունել է, որ վառելիքի գների աճն իր ազդեցությունն ունի կյանքի ընդհանուր թանկացման վրա, թեև Ֆրանսիան առնչություն չունի վառելիքային ճգնաժամի պատճառների հետ։ Նա խոստացել է առաջիկայում բանակցություններ վարել Պարսից ծոցի երկրների հետ՝ նավթի և նավթամթերքի գների աճը զսպելու նպատակով։
Նախագահը նաև ընդգծել է բոլոր շահագրգիռ կողմերի մասնակցությամբ երկխոսություն ծավալելու անհրաժեշտությունը՝ թե՛ ցուցարարների, թե՛ նրանց բողոքի թիրախ դարձած կողմերի ներգրավմամբ։
«Բոլորը պետք է նստեն մեկ սեղանի շուրջ և մասնակցեն քննարկմանը՝ աշխատողները, ուսանողները, տեղական ինքնակառավարման մարմինների ներկայացուցիչներն ու քաղաքական գործիչները», — հայտարարել է Մակրոնը։
Նա հիշեցրել է, որ վեց ամիս անց Ֆրանսիայում ընտրություններ են անցկացվելու, և երկիրը պետք է դրանց ընդառաջ գնա՝ չկորցնելով ժողովրդավարությանն աջակցելու հարցում իր միասնականությունը։
