Հայկական ավանդական քոչարին ոչ միայն մեր մշակույթի այցեքարտերից մեկն է, այն նաև հայ ժողովրդի ինքնության, ինքնաարտահայտման մի մասնիկը, որ ապրում է յուրաքանչյուրի հոգում` անկախ բնակության վայրից ու տարածությունից:
Քոչարին նաև համախմբման մեծ ուժ ունի, որն էլ դարձել է Ֆրանսիայի Գրենոբլ քաղաքի հայ համայնքի հերթական նախաձեռնության առանցքը` «Արի պարի Քոչարի» անունը կրող ֆլեշմոբով` նվիրված Հայաստանի 1-ին Հանրապետության 100 և Էրեբունի-Երևանի հիմնադրման 2800-ամյակներին:
Գրենոբլի մշակույթի տան ադմինիստրատիվ վարչության անդամ Սիրանուշ Խաչատրյանի փոխանցմամբ` «Արի պարի Քոչարի» նախաձեռնությունը առաջին համահայկական ֆլեշմոբն է, որը փորձ է աշխարհի 6 մայրցամաքներում ապրող հայերին նույն օրը` մայիսի 26-ին, համախմբելու մեկ պարի շուրջ` ի նշան մեր ժողովրդի միասնության և մեր փառավոր հաղթանակների:
Նախաձեռնությունը կյանքի կոչելու համար ֆլեշմոբի հեղինակներին միացել են Իզերի դեպարտամենտը, Գրենոբլի քաղաքապետարանը, աջակիցներն են ՀՀ Սփյուռքի նախարարությունը, Լիոնի փոխհյուպատոս Գայանե Մանուկյանը:
Ֆլեշմոբին կարող են մասնակցել բոլորը` պարային համույթներ, այս նախաձեռնության շրջանակներում ինքնակազմակերպված խմբեր` առանձին շենքերից, կոլեկտիվներից մինչև համայնքներ:
Մինչ օրս Սևան համայնքից «Արի պարի Քոչարի» ֆլեշմոբին մասնակցելու հայտ են ներկայացրել «Սևան» /գեղարվեստական ղեկավար, պարուսույց` Իշխան Խաչատրյան/, «Ախթամար» /գեղարվեստական ղեկավար Արմեն Խաչատրյան, պարուսույց` Պարգև Վարդանյան/, «Հայորդի» /պարուսույց` Հրաչյա Խաչատրյան/ ժողովրդական պարերի համույթները, Մ. Մաշտոցի անվան թիվ 1 հիմնական դպրոցը, Սևանի համայնքապետարանը:
Մայիսի 26-ին Սևան քաղաքի գլխավոր փողոցը` Նաիրյանը, կշնչի հայկական Քոչարիով:
Հայաստանի և աշխարհասփյուռ հայերին համախմբող Քոչարի պարը տեսագրվելու և տեղադրվելու է համացանցում:
Նախագծի կազմակերպիչները վստահ են, որ ֆլեշմոբի մասնակիցները զարմացնելու, հիացնելու, ապրեցնելու են իրենց պարով` դառնալով այս ինքնատիպ նախաձեռնության կյանքի կոչողներն ու գլխավոր հերոսները:
Հավելենք, որ ֆլեշմոբին մասնակցել ցանկացող համույթների և խմբերի հայտագրումը շարունակվում է:
Ա. ՂՈՒԿԱՍՅԱՆ