Վանաձորի երիտասարդները բողոքում են իրենց առողջական վիճակից:
20-ամյա Հարություն Սիմոնյանը բողոքում է սրտի մշտական ցավից` ասելով. «Երբ անհանգստանում եմ կամ շատ մտածում, սիրտս սկսում է ծակել: Հիմա ոչ միայն ծակում է, այլև` ցավում»: Ներվային անկայուն համակարգի մասին էլ խոսում է քսաներեքամյա Հեղինեն: Այժմ այն հիվանդությունները, որ նախկինում բնորոշ էին գլխավորապես մեծահասակներին, հատկանշական են դարձել երիտասարդների համար ևս: 25-27 տարեկան վանաձորցիների շրջանում վերջերս եղել են նույնիսկ ինֆարկտակիրներ: Այս մասին մեզ հետ զրույցում պատմեց Վանաձորի թիվ 2 հիվանդանոցի տնօրեն Կարեն Ադամյանը: Վերջինս նաև նշում է մի քանի հիվանդությունների երիտասարդացման պատճառներ: «Սոցիալական անկայուն վիճակ, առողջ ապրելակերպ, խիստ վատ սննդային ռեժիմ, հիպոդինամիա»:
Առողջությունն անգնահատելի պարգև է, որին պետք է հետևել յուրաքանչյուր տարիքում: Իսկ այդ պատճառները չեզոքացնելու, այսինքն` հիվանդությունների երիտասարդացումը կանխելու համար կարևոր է մասսայական սպորտի զարգացումը: «Նայում եմ Վանաձորի փողոցները և տեսնում` քայլում է 20-25 տարեկան երիտասարդ, նրա աչքերը գունատ են, անփայլ, նա կռացած է: Նրա փրկությունը սպորտի մեջ է: Եվ կարևոր է ոչ միայն մարտարվեստով, այլև լողով, թեթև ատլետիկայով զբաղվել»,- նշում է Կարեն Ադամյանը: Դրան զուգահեռ՝ երիտասարդը պետք է շարժման մեջ գտնվի` համակարգչի առջև երկար ժամանակ անցկացնելու փոխարեն: Վերջինիս պատճառով առաջանում է հիպոդինամիայի խնդիրը: Սակայն քանի որ վանաձորցի երիտասարդը այդքան էլ շատ զբաղմունքներ չունի, համակարգիչը նրա համար դարձել է անփոխարինելի:
Հանրապետության երրորդ քաղաքում երիտասարդների համար խնդիր է նաև աշխատատեղերի բացակայությունը, ինչն էլ մտածմունքի ու դեպրեսիայի առաջացման համար լավագույն պատճառներից է: Իսկ դեպրեսիան, հոգեկան անկայուն վիճակը կարող են բազմաթիվ հիվանդություններ առաջացնել:
Կարեն Ադամյանն առաջարկում է նաև մշտապես արշավների գնալ: Դա և զբաղմունքի, և առողջ ապրելակերպ վարելու միջոց է:
Սերինե Գաբրիելյան
