«Փարիզյան սուրճ» ընկերության սեփականատեր, ֆրանսահայ գործարար Վալերի-Աշխեն Գործունյանը վաճառում է ընկերությունը եւ հեռանում Հայաստանից։ Մեր հարցազրույցը Վալերի-Աշխեն Գործունյանի հետ բացահայտում է իրականությունը եւ նույնիսկ վեր հանում որոշ սենսացիոն մանրամասներ. «Շուրջ 16 տարի է՝ ասում եմ, որ մրցակցությունը Հայաստանում արդար չէ։ Մրցակիցները սուրճի մեջ դնում են գարի, ձավար կամ մեկ այլ բան, որ հնարավոր է՝ վնասեն առողջությանը, իսկ պետությունը, չնայած նշածս խախտումներին, դրանց դեմ համարժեք պայքար չի մղում, սպառողների շահերն ու առողջությունը պատշաճ չի պաշտպանում։ Ես միայնակ չեմ կարող պայքարել այդ ամենի դեմ։
Այստեղի հասարակությունը, ի տարբերություն Ֆրանսիայի, տղամարդու հասարակություն է, եւ մանավանդ միայնակ կնոջ համար դժվար է։ Տղամարդկանց մեծամասնության կարծիքով՝ կինը չի կարող խելացի լինել։ Բիզնես հասարակության մեջ միայնակ կին լինել եւ «ախպար» լինել՝ շատ մեծ մինուս է։
Երբ ես արդեն մենակ էի, իմ կողքին տղամարդ չկար, ոմանք իմացան այդ մասին ե փորձեցին ինձ ինչ–որ բաներ պարտադրել, իմ բիզնեսից փայաբաժին պահանջեցին՝ պատճառաբանելով, ու դրա դիմաց ինձ պաշտպանելու են, տանիք են լինելու։ Իմ բնավորությունն այնպիսին չէ, որ համաձայնեի, ենթարկվեի. մերժեցի, բայց դրա համար շատ թանկ վճարեցի: Ես հեռանում եմ»,- ասում է տիկին Գործունյանը:
«Հայացք»
