Արտակ Նազարյանի մահվան գործով դատավարության հուլիսի 3-ի նիստում, օրվա երկրորդ կեսին դատարանում ցուցմունքներ տվեց քրեական գործով գլխավոր ամբաստանյալ, կապիտան Հակոբ Մանուկյանը: Գումարտակի հրամանատարի նախկին տեղակալին հարցեր տալուց առաջ տուժողի իրավահաջորդի ներկայացուցիչ, իրավապաշտպան Ռուբեն Մարտիրոսյանը նրան հորդորեց սուտ չխոսել: Իրավապաշտպանն ասաց, որ ինքը նախկինում պաշտպանել է բանակում զինվորների շահերն ընդդեմ սպաների, ոչ թե բոլոր սպաների, այլ` ընդդեմ հանցագործ սպաների, զինվորական դատախազների, դատավորների, քննիչների: Դատավոր Մարդանյանը, ձայնը բարձրացնելով, Մարտիրոսյանից պահանջեց իրեն կոռեկտ պահել, չափի մեջ լինել եւ կոնկրետ ասել, թե հանցագործ ո՞ր դատավորի, դատախազի, քննիչի մասին է խոսքը եւ իրավապաշտպանին կոչ արեց ամպագորգոռ, անպատասխանատու հայտարարություններ չանել: Ռուբեն Մարտիրոսյանը ասաց, որ միջնորդում է դատարանին դիմել պաշտպանության նախարարություն, որտեղից տեղեկանք կտրվի վերոհիշյալի մասին:
Ռ. Մարտիրոսյանը սկսել թվարկել օրինազանց դատախազների, քննիչների անունները, հավելելով, որ ինքը նիստը նախագահող Սամվել Մարդանյանի դեմ 2002թ. «Իրավունք հետաքննություն» թերթում հոդված է հրապարակել: Իրավապաշտպանը հարցեր էր ուղղում ամբաստանյալ Հակոբ Մանուկյանին, երբ դատավոր Մարդանյանը հայտարարեց, որ դահլիճից խմիչքի վատ հոտ է գալիս եւ հարցրեց, թե ով է ոգելից խմիչք օգտագործել: Ամբաստանյալ զինվորներից մեկի հայրը ոտքի կանգնեց, դատավորը նրան դահլիճից դուրս հրավիրեց: Դրանից հետո դատավորն ասաց, որ խմիչքի հոտը Ռուբեն Մարտիրոսյանից է: Վերջինս հարցաքննվող Հակոբ Մանուկյանի դեմ-դիմաց, դատավորին մոտ էր նստած: Ս. Մարդանյանն ասաց, որ Ռուբեն Մարտիրոսյանը գինովցած է,«խմած» եւ ամպագորգոռ հայտարարություներ է անում: Իրավապաշտպանը, ըստ էության չժխտեց, որ ոգելից խմիչք է օգտագործել, ասելով, որ «օգտագործած» բառն այլ բան է նշանակում, «խմածը»՝ ուրիշ: Դատավորը դատական սանկցիա կիրառելով՝ դուրս հրավիրեց Ռուբեն Մարտիրոսյանին:
Տուժողի իրավահաջորդի ներկայացուցիչ, փաստաբան Մուշեղ Շուշանյանը դատարանում Ռուբեն Մարտիրոսյանի վարքագիծը համարեց շատ պատշաճ, իրավիճակին համարժեք: Շուշանյանի խոսքերով՝ նիստեր են եղել, որ Ռուբեն Մարտիրոսյանը շատ ավելի սուր հայտարարություններ է արել: Դատական հաջորդ նիստին, որը կկայանա հուլիսի 10-ին, Հակոբ Մանուկյանի հարցաքննությունը կշարունակվի:
Ոսկան ՍԱՐԳՍՅԱՆ
