Նոյեմբերի 22-ին Տավուշի մարզպետարանի դահլիճում կայացել է ոստիկանության մարզային վարչության ղեկավարության հանդիպումը «հասարակայնության ներկայացուցիչների հետ»: Ինչպես տեղեկացնում է Տավուշի մարզպետարանը, այդ հանդիպման նպատակը եղել է «ոստիկանության և հասարակության միջև կապի ամրապնդումը, անմիջական շփման միջոցով թերությունների ու խնդիրների վեր հանումը և վստահության ու թափանցիկ աշխատանքի մթնոլորտի ստեղծումը» : Հանդիպմանը մասնակցել են մարզի համայնքների ղեկավարներ, դպրոցների եւ բուժհաստատությունների տնօրեններ, ուսանողներ, վետերաններ, հ/կ-ների եւ բնապահպանական ոլորտի ներկայացուցիչներ: Ժողովը բացել է Տավուշի մարզպետ Արմեն Ղուլարյանը:
Հանդիպման ժամանակ քննարկում է ծավալվել բնապահպանական խնդիրների, անչափահասների հետ տարվող աշխատանքի, ինչպես նաև հասարակական նշանակության հարցերի, մասնավորապես՝ ճանապարհային նշանների, փողոցներում լուսակիրների տեղադրման ու երեխաներին դրանց ուսուցման կանոնների, աղբահանության վերաբերյալ:
Ոստիկանության Տավուշի մարզային վարչության պետ Արշավիր Գեւորգյանը ներկաներին առաջարկել է մասնակցել «բաց եւ թափանցիկ զրույցի»: Մարզի գլխավոր ոստիկանը ընդգծել է իրավախախտումների հանդեպ քաղաքացիական վերաբերմունքի դրսևորման կարևորությունը, որին հասնել կարելի է միայն հասարակության վստահության ու ակտիվ համագործակցության միջոցով:
Հերթական անգամ ոստիկանության մարզային վարչության պետը հանդիպում է ունենում «հասարակայնության ներկայացուցիչների հետ», եւ հերթական անգամ հանդիպումը կայանում է մարզպետարանի դահլիճում՝ առանց մարզի իրավապաշտպան կառուցների՝ Տավուշի մարզի հակակոռուպցիոն կենտրոնի եւ մարդու իրավունքների պաշտպանի Տավուշի մարզային գրասենյակի ներկայացուցիչների, մարզի լրատվամիջոցների ներկայացուցիչների:
Կարդացեք նաև
Ոսկան ՍԱՐԳՍՅԱՆ
