«Կառավարությունը քայլ արեց դեպի գյուղացին, դիզվառելիքի, պարարտանյութի հարցը լուծվեց, գյուղերում պարարտանյութի 1 պարկը բաժավելու է 6 հազար դրամով եւ անցած տարվա պես որոշ գյուղացիներ չեն կարողանալու վրան գին ավելացնել եւ թանկ վաճառել: Պարարտանյութի դեֆիցիտ չի լինելու, եւ գյուղացին կարող է անսահմանափակ գնել: Դիզվառելիքը լիտրը 350 դրամ կլինի»,-այսօր «Հենարան» ակումբում այսպիսի լավատեսական տրամադրությամբ «Ագրարագյուղացիական միավորում» հ/կ նախագահ Հրաչ Բերբերյանը ներկայացրեց գյուղատնտեսական տարին:
ՀՀ նախագահի թեկնածուների նախընտրական ծրագրերից, գյուղոլորտի մասնագետի համար «ամենաիրատեսականը» ՀՀ գործող նախագահ, թեկնածու Սերժ Սարգսյանի ծրագիրն է: Թեկնածուներից մեկն էլ, ըստ պարոն Բերբերյանի, նախընտրական ծրագրի գյուղատնտեսական հատվածը «նկարել» է իր աշխատություններից: Բայց թե ով, Հրաչ Բերբերյանը չցանկացավ անուններ հրապարակել: Իշխանությունների հասցեին հնչեցրած լավատեսական ելույթից հետո, լրագրողներից մեկը կատակեց` մի խոսքով, ընտրություններից հետո լավ տարի է սպասվում:
«Այս տարի ջրի խնդիր չենք ունենալու, քանի որ լավ ձնածածկ է եղել, հողի խոնավությունն էլ շատ լավ է: Եթե ցրտահարություն չլինի, լավ բերք կունենանք: Կարտոֆիլի, հացագործության համար բարենպաստ տարի է լինելու»,-շարունակեց պարոն Բերբերյանը: Ըստ նրա, անցյալ տարի անասնակերի խնդիր եղավ եւ այդ պատճառով այս տարի անասունների զանգվածային մորթ է սպասվում, գարնանն էլ մսի թանկացում կանխատեսեց: Խոտի դեֆիցիտի պատճառով, անցյալ տարի խոտի 1 փաթեթը (տուկ) վաճառվում էր 2500-3000 դրամով:
Պարոն Բերբերյանի դժգոհությունները անցած տարվա առնչությամբ` տեսանյութում.
Կարդացեք նաև
Հարցին, թե ինչ կարծիք ունի կառավարության որոշման` Սյունիքի արոտավայրերը Իրանի անասուններին տրամադրելու մասին, պարոն Բերբերյանն ասաց, որ սկզբունքորեն դեմ չէր, բայց գտնում էր, որ «մենք էլ կարող էինք օգտագործել, բայց քանի որ չենք օգտագործում, ինչը շատ մեծ սխալ ենք անում, ավելի լավ է այդ արոտավայրերը պարապ չմնան»:
Ըստ մասնագետի, այս տարի կառավարությունը կլուծի նաեւ լոլիկի եւ այլ բանջարաբոստանային կուլտուրաների շրջանում տարածված ցեցի խնդիրը: Ցեցի ձեռքը կրակն ընկած այն 45-50 տնտեսություններին կառաջարկվի փոխել կուլտուրաների տեսակները եւ լոլիկի, բիբարի փոխարեն սոխ ցանել. «Կարծում եմ՝ կառավարությունը գյուղացուն սոխի սերմացուն անվճար կբաժանի, եւ քանի որ 10 հազար տոննա սոխ է ներկրվում մեր երկիր, ինչը կնշանակի՝ սոխի պահանջարկ կա, այդ պակասը տեղական սոխով կլրացվի, ինչն ավելի որակյալ է: Իսկ այն գյուղացիները, որոնք չեն համաձայնի սոխ ցանել, նրանց թունաքիմիկատ կբաժանվի ցեցի դեմ եւ 6-7 անգամ կսրսկեն իրենց բոստանները»:
Պարոն Բերբերյանը նաեւ ասաց, որ կարտոֆիլի պաշարները շուտով կվերջանան եւ գյուղացին սեմացուի համար պահած կարտոֆիլը կհանի վաճառքի: Ըստ նրա՝ ճիշտ գյուղատնտեսություն կազմակերպելու համար մեր երկրում բացակայում են «ինտենսիվ տեխնոլոգիաները», բացի այդ, անհրաժեշտ է հողերի խոշորացում. «Արարատի հարթավայրի ֆերմերը առնվազն 5 հեկտար պետք է հող մշակի, որ արդյունքի հասնի: Լեռնային գոտում էլ 10 հեկտարից պակաս հող մշակելն անիմաստ է»:
Լուսինե ԲՈՒԴԱՂՅԱՆ
