Սամվել Մարտիրոսյանը ամփոփեց IDitord-ի աշխատանքները
Այսօր Մեդիա կենտրոնի հյուրն էր տեղեկատվական անվտանգության փորձագետ, IDitord.org-ի համակարգող Սամվել Մարտիրոսյանը, ով ամփոփելով IDitord-ի աշխատանքները` արձանագրեց, որ ի տարբերություն խորհրդարանական ընտրությունների` նախագահական ընտրապայքարում առկա են զուսպ ցուցանիշներ. «Ստացել ենք ընտրախախտումների վերաբերյալ 90 ահազանգ, մինչդեռ խորհրդարանական ընտրությունների պարագայում դրանք 500-ն էին: Յուրաքանչյուր քաղաքացի, ով ականատես է եղել ընտրախախտման, կարող է ահազանգել IDitord-ին: Բացի այդ, այս անգամ ահազանգերն առավել վստահելի էին: Ոչ անոնիմ ահազանգերը համարվում են վստահելի: Խորհրդարանական ընտրությունների շուրջ ահազանգերի կեսը վստահելի են եղել, իսկ նախագահական ընտրությունների պարագայում` գրեթե 90 տոկոսը:
Դերակատարություն ունեցավ Րաֆֆի Հովհաննիսյանի նախընտրական շտաբը, որը մեծ քանակությամբ ահազանգեր էր հավաքագրել բնակչությունից եւ ներկայացրել IDitord-ին»:
Մարտիրոսյանը հավելեց, որ 16 դեպքում ընտրախախտումների մասին ահազանգերն արժանացել են արձագանքի, օրինակ` գլխավոր դատախազության եւ ոստիկանության կողմից. «Կաշառքի վերաբերյալ դեպքեր քիչ են գրանցվել: Իսկ սադրիչ հաղորդագրությունները IDitord-ում չեն հրապարակվել. օրինակ` «ամբողջ քաղաքին կաշառք է բաժանում» բովանդակությամբ ահազանգը»:
Կարդացեք նաև
Փորձագետը նշեց, որ IDitord-ի լրագրողների խումբը որոշ ահազանգեր անձամբ է ստուգել եւ հրապարակել փաստեր, որոնք հասանելի են ԶԼՄ-ների ներկայացուցիչների համար:
Սամվել Մարտիրոսյանի խոսքով. «Վստահելի ահազանգերի թվի աճը պայմանավորված է այն հանգամանքով, որ մարդիկ քիչ են վախենում, մինչդեռ խորհրդարանական ընտրությունների ժամանակ առկա էր սեւ PR. կուսակցությունները անանուն եւ վարկաբեկող հաղորդագրություններ էին տարածում միմյանց մասին` չապահովելով ընտրությունների թափանցիկությունը»:
Լուիզա ՍՈՒՔԻԱՍՅԱՆ
