Սրտանոթային հիվանդությունները երիտասարդացել են ոչ միայն Հայաստանում, այլև՝ ամբողջ աշխարհում:Այս մասին այսօր լրագրողների հետ հանդիպմանն ասաց «Դիագնոստիկա» բժշկական կենտրոնի սիրտ-թոքային կլինիկայի ղեկավար սրտաբան Մարինե Օրդյանը՝ նշելով, որ հիվանդությունը հիմնականում գլուխ է բարձրացնում աշնանը եւ գարնանը: Ըստ սրտաբանի՝ դա պայմանավորված է այս շրջանում մթնոլորտային ճնշման տատանումների, անկայուն եղանակի, օդում թթվածնի քանակի պակասեցման հետ։
Օրդյանը նկատեց, որ Հայաստանում ավելի հաճախ ծխամոլությունն է պատճառ դառնում սրտանոթային հիվանդությունների առաջացմանը: Նա նշեց նաև, որ լուրջ խնդիր է ալկոհոլի չարաշահումը, նստակյաց կյանքը, նյարդահոգեբանական ծանրաբեռնվածությունը, նաև՝ սխալ սնունդը: Բանախոսը խորհուրդ տվեց սննդակարգից հանել կծու, յուղոտ կերակուրները. «Նախընտրելի է դյուրամարս սնունդ, մեծ քանակությամբ բանջարեղեն»:
Ըստ մասնագետի ՝ սրտանոթային հիվանդության հիմնական նախանշաններն են՝ գանգատներ սրտի շրջանում, ճնշման տատանումներ, շնչարգելություն: «Եթե տուժողի մոտ նկատել եք ինֆարկտի նշաններ, ապա օգնեք նրան հարմար դիրք ընդունել, գերադասելի է պառկեցնել նրան։ Ոչինչ մի տվեք խմելու կամ ուտելու։ Անհապաղ կանչեք շտապօգնություն և դեպքի վայր ժամանած բժիշկներին նկարագրեք ախտանիշները»,-ասաց բժշկը՝ ավելացնելով, որ հայերը դիմում են բժշկի այն ժամանակ, երբ դանակը հասնում է ոսկորին:
Սրտանոթային հիվանդություններից խուսափելու համար մասնագետը խորհուրդ տվեց շատ զբոսնել, խուսափել ավելորդ սթրեսներից, անհրաժեշտության դեպքում նյարդային համակարգը հանգստացնող խոտաբույսերի թուրմեր ընդունել, ինչպես նաեւ ժամանակ առ ժամանակ կանխարգելիչ ստուգում անցնել:
Կարդացեք նաև
Պերճուհի ԳԵՎՈՐԳՅԱՆ