«Շտապօգնության ծառայությունը ճիշտ ժամանակին հասել է, ցավոք՝ նրա կյանքը հնարավոր չի եղել փրկել»,- լրագրողների հարցին՝ ինչո՞ւ ժամանակին շտապօգնություն չի հասել քրեակատարողական հիմնարկ, որպեսզի հնարավոր լիներ խուսափել Ստեփանավանի քաղաքապետի թեկնածու Արսեն Գևորգյանի մահից, լրագրողների հետ ճեպազրույցում այսպես պատասխանեց ՀՀ առողջապահության նախարար Անահիտ Ավանեսյանը։
Հարցին՝ բայց եթե բժիշկ լիներ քրեակատարողական հիմնարկում, գուցե հնարավոր կլինե՞ր խուսափել մահից, նախարարն արձագանքեց․ «Հանկարծամահություններն ամենացավալին են, երբ երիտասարդ անձինք են հանկարծամահ լինում, դա ամենաշատ հարցերն առաջացնողն է։ Ցավոք, դա տեղի է ունենում, բայց դա չի նշանակում, որ մենք մանրակրկիտ չենք անդրադառնալու բուժօգնության կազմակերպման շղթային»։
Ի պատասխան լրագրողների հարցերին, թե ինչու բժիշկ չի եղել քրեակատարողական հիմնարկում, Անահիտ Ավանեսյանն ասաց, որ այդ քրեակատարողական հիմնարկում հերթապահ բժիշկ չկա, քանի որ այնտեղ բժշկական ստացիոնար ծառայություն չկա։
Տաթև ՀԱՐՈՒԹՅՈՒՆՅԱՆ



















































