«Մենք պետք է մերկացնենք հայկական քարոզչությունը եւ միջազգային հանրությանը հասցնենք, թե ինչ է կանգնած մեզ վրա հարձակումների հետեւում: Այս հարցը շատ պարզ է, որովհետեւ հայկական լոբբին է մեր հանդեպ այդ գործողություններն իրականացնում: Առաջին հերթին դա կապված է թշնամանքի հետ. մենք հայկական լոբբիի համար մշտական թշնամիներ ենք, թող ոչ ոք չմոռանա այդ»,- այս մասին, ըստ «Apa»-ի, հայտարարել է Ադրբեջանի նախագահ Իլհամ Ալիեւը:
Ադրբեջանի ազգային մամուլի 140-ամյակի առթիվ այդ երկրի Մամուլի խորհրդի անդամների հետ հանդիպման ընթացքում Ալիեւը նշել է, թե հայկական լոբբին ցանկանում է ապացուցել, որ Ադրբեջանում ժողովրդավարություն չկա. «Հայկական լոբբին փորձում է ապացուցել, թե Ադրբեջանում խախտվում են մարդու իրավունքները եւ այդպիսով հայկական փոքրամասնությունն ապագայում չի կարողանա ապրել Ադրբեջանի կազմում. սա աբսուրդ է»:
Ըստ Ալիեւի՝ Ադրբեջանը բազմաէթնիկ եւ բազմակրոն երկիր է եւ որ այնտեղ ստեղծված են եզակի պայմաններ, որոնք կարող ենք օրինակ ծառայել շատ երկրների համար. «Սակայն այդ քարոզչության եւ հակաադրբեջանական խմբավորման հետեւում կրկին կանգնած է Լեռնային Ղարաբաղի հակամարտությունը: Այդ պատճառով մենք պետք է Ադրբեջանն աշխարհի մեդիա մարմիններին ներկայացնենք որպես ժամանակակից, զարգացող, բաց, հանդուրժող երկիր»:
Ադրբեջանի նախագահը մամուլի ներկայացուցիչներին նաեւ հրահանգել է լայնորեն լուսաբանել, ինչպես հայ-ադրբեջանական Լեռնային Ղարաբաղի հակամարտության պատմությունն, այնպես էլ նրա պատմական իրողությունները, Ադրբեջանի դիրքորոշումը եւ այսօր տեղի ունեցող իրադարձությունները:
Կարդացեք նաև
Պատրաստեց Աշոտ ԻՍՐԱԵԼՅԱՆԸ
