Վրաստանի՝ Եվրամիությանն անդամակցելու գործընթացը փաստացի կասեցված է, իսկ ԵՄ անդամակցության թեկնածու երկրի կարգավիճակն այժմ միայն ձևական բնույթ ունի, ասվում է Եվրահանձնաժողովի՝ այսօր հրապարակված ընդլայնման զեկույցում։
Ըստ Բրյուսելի՝ Վրաստանի իշխանությունները ոչ միայն չեն կատարել թեկնածուի կարգավիճակ ստանալու համար սահմանված ինը հանձնարարականները, այլև երկրում ժողովրդավարության վիճակը շարունակել է վատթարանալ։
Եվրահանձնաժողովը մտահոգություն է հայտնել նաև ընդդիմադիր կուսակցություններն արգելելու փորձերի, դատական համակարգի անկախության խնդիրների և քաղաքացիական ազատությունների սահմանափակումների կապակցությամբ։
«Եթե Վրաստանի իշխանությունները չփոխեն իրենց քաղաքականությունը և չվերադառնան ԵՄ անդամակցության հիմքում ընկած հիմնարար սկզբունքներին, երկիրը չի կարող օգտվել ո՛չ թեկնածուի կարգավիճակի առավելություններից, ո՛չ էլ անդամակցության նախապատրաստման գործընթացից», – ասված է հայտարարությունում։
Կարդացեք նաև
Վրաստանը ԵՄ անդամակցության թեկնածուի կարգավիճակ ստացել է 2023 թվականի դեկտեմբերին։ Մեկ տարի անց՝ 2024-ի նոյեմբերին, կառավարությունը հայտարարեց, որ մինչև 2028 թվականը չի բարձրացնելու Եվրամիությանն անդամակցելու բանակցություններ սկսելու հարցը։
