Ինչպես ավելի վաղ հայտնել էինք, «Հայ խոհարարական ավանդույթների զարգացման և պահպանման» հասարակական կազմակերպությունն այսօր «Մեգերյան կարպետ» ցուցասրահում ամփոփեց այս տարվա գործունեությունը: Կազմակերպվեց նաեւ «Ղափամայի շուրջ» ավանդական միջոցառումը, որի ընթացքում հյուրերին ներկայացվեց դդմից պատրաստված «Ղափամա» ավանդական կերակրատեսակը:
«Վստահաբար կարող եմ ասել, որ մեր կազմակերպության գործունեության արդյունքում «Ղափաման» մտել է մեր կենցաղ, օրինակ՝ շատ հարսանիքների ժամանակ մատուցվում է որպես աղանդեր: Այն նաեւ ծիսական-տոնական կերակրատեսակ է, խորհրդանշում է պտղաբերությունն ու մայրությունը եւ տոներին միշտ զարդարել է հայերի սեղանները: Ուրախությամբ եմ ասում, որ նախկինում մոռացված «Ղափաման» այսօր բավականին տարածված է»,-Aravot.am-ի հետ զրույցում ասաց «Հայ խոհարարական ավանդույթների զարգացման և պահպանման» ՀԿ նախագահ Սեդրակ Մամուլյանը:
Նա նշեց, որ մսային «Ամիճը» եւս ամանորյա սեղանի անփոխարինելի զարդ կարող է լինել. «Օրինակ՝ ձավարով կամ մրգերով լցոնված հնդկահավ, հավ կամ սագ, ինչպես նաեւ՝ «Տոլմա», «Մշոշ», «Անուշապուր», բայց գլխավոր տոնական կերակրատեսակը «Քաշիկան» է՝ «Հարիսա»-ի տարատեսակներից: «Հարիսա»-ից տարբերվում է նրանով, որ չի խառնվում, որպեսզի գալիք տարին խառնակ չլինի»:
Կարդացեք նաև
Մեր զրուցակցի խոսքով՝ տոնական սեղանին պարտադիր պետք է լինի տարեհացը. «Դա այն քաղցր հացն է, որի մեջ թաքցնում են մետաղադրամ»:
Ղափամայի մասին մանրամասն՝ տեսանյութում
Լուիզա ՍՈՒՔԻԱՍՅԱՆ
