«Ապրիլի 2-5-ի դեպքերի ժամանակ հակասական ապրումներ ենք ունեցել`եւ վիշտ ապրեցինք եւ հպարտություն»,- այսօր «Հայացք» մամուլի ակումբում խոսելով ապրիլի 1-ի լույս 2-ի գիշերը Ադրբեջանի կողմից սանձազերծված չորսօրյա պատերազմի մասին, ասաց Շուշիի առանձնակի գումարտակի հրամանատար, «Նոր Հայաստանի» քաղխորհրդի համակարգող Ժիրայր Սեֆիլյանը:
«Վերջին տարիներին հուսալքված մթնոլորտ էր, բայց մեր երիտասարդները հակառակը ապացուցեցին: Այս սեղմ ժամկետներում այնքան հերոսական դրվագներ եղան, որոնց մասին դեռ տարիներ կխոսենք»,- ասաց նա:
Արցախյան պատերազմի սերնդի ներկայացուցիչն արձանագրում է` երիտասարդներն իրենց գերազանցեցին` տասնապատիկ ավելի քանակով հակառակորդին դիմագրավեցին. «Փամփուշտները սպառվեցին, բայց երիտասարդներն իրենց դիրքերը չլքեցին: Բոլորս էլ խոնարհում ենք մեր գլուխները նահատակ եւ կենդանի հերոսների առաջ: Մեր հետագա քաղաքական գործունեությունը պետք է միտված լինի այս ամենն իմաստավորելուն»:
Ապրիլի 2-ի հարձակումը Ժիրայր Սեֆիլյանը համարում է նախորդ երկու տարիների իրադարձությունների շարունակությունը, երբ հակառակորդը եւ որակապես, եւ քանակապես ուժեղացնում էր իր ճնշումները. «Մնացել է, որ հակառակորդը միայն օդուժ կիրառի: Բայց ապրիլի 2-ը Արցախը գրավելու գործողություն չէր: Զինադադարի խախտումներն, այսուհետ, լինելու են այս մասշտաբի եւ այս կարգի: Հեռանկարային իմաստով սա ի վնաս մեզ է`մարտավարություն է ընտրված հյուծել ու մաշեցնել մեզ ֆիզիկապես եւ բարոյապես: Դրան նպաստում է նաեւ մեր ապիկար իշխանությունների պահվածքը»:
Կարդացեք նաև
Դժբախտաբար, հակառակորդը մասնակի հաջողություններ ունի հյուսիսային հատվածներում եւ, ըստ Ժիրայր Սեֆիլյանի, եթե մեր բանակի մարտունակությունը չլիներ, Թալիշը իրենց ձեռքն պետք է լիներ, Մատաղիսն էլ չեզոք վիճակում:
Այս հարձակմամբ, սակայն, ըստ Ժիրայր Սեֆիլյանի, հակառակորդին, այդուհանդերձ, հաջողվեց «մեծ վնաս» հասցնել մեզ: Զոհերի հրապարակված թիվն է շատ մեծ: Նա արձանագրում է, որ անգամ արցախյան պատերազմի թեժ օրերին մեկ-երկու օրում այդքան զոհ չենք ունեցել:
Ապա` ճեղքելով «անառիկ բերդի համբավ ձեռք բերած մեր դիրքերը», Ժիրայր Սեֆիլյանը փաստում է, որ հակառակորդը նաեւ հոգեբանական մեծ վնաս է հասցրել եւ զինվորին, եւ ժողովրդին: Ըստ նրա, այս իրավիճակում, առաջին գծում կանգնած, պատիվ ունեցող սպայի եւ զինվորի համար, անհասկանալի է, թե ինչո՞ւ չկա դիրքերը վերականգնելու հրաման:
Ժիրայր Սեֆիլյանը հոգեբանական պարտություն է համարում նաեւ այն, որ տարածքի բնակիչները, սպաների ընտանիքները նույն հանգստությամբ չեն կարող մոտ ժամանակներս ապրել այդ տարածքներում:
Ժիրայր Սեֆիլյանին անհասկանալի է մնացել նաեւ այն, թե ինչո՞ւ այդ պատերազմի օրերին պետությունը մոբիլիզացիա չհայտարարեց, մարդիկ ինքնակազմակերպվեցին: «Գերագույն գլխավոր» հրամանատարը վախենում է մոբիլիզացիա հայտարարել»,- ասաց Ժիրայր Սեֆիլյանը`հավելելով, որ մենք խնդիր ունենք մեր զոհերի կատարածն իմաստավորելու, իսկ դրա քայլը մեկն է. «Կատարել քայլ եւ ծնկի բերել հակառակորդին`լիարժեք խաղաղություն հաստատելով: Քանի այդ քայլը չենք կատարել, նման հարվածներ միշտ էլ ստանալու ենք»:
Ըստ նրա, Ալիեւն այս ամենը չէր կարող անել առանց աշխարհաքաղաքական հովանավորների, բայց այդ մասին «Նոր Հայաստանը» երկու օրից կխոսի:
Նելլի ԳՐԻԳՈՐՅԱՆ
