ՀՀԿ ԳՄ նիստի ավարտին այսօր ՀՀԿ խոսնակ Էդուարդ Շարմազանովը լրագրողների հետ զրույցում մեկնաբանեց «ԵԼՔ» դաշինքի՝ այս գիշեր եւ օրվա ընթացքում Տարոն Մարգարյանի նախընտրական շտաբի կողմից ընտրակեղծիքներ թույլ տալու մասին ահազանգերը:
«Մենք ասել ենք, որ այդ ամենն իրականությանը չի համապատասխանում: Ընտրակաշառքի վերաբերյալ կարծիքներ կեղծ ահազանգեր են: «ԵԼՔ»-ի հրապարակած տեսանյութում չկա ընտրակաշառքի վերաբերյալ որեւէ փաստ: Եթե որեւէ մեկը՝ լինի Փաշինյանը, կամ Փոստանջյանը, ունեն դժգոհություն, պետք է դիմեն իրավապահներին: Դա նաեւ այսօրվան է վերաբերում»,-նշեց Էդուարդ Շարմազանովը:
Նրա բնորոշմամբ՝ ընտրակաշառքների վերաբերյալ բոլոր մեղադրանքները մերկապարանոց են: «Ոչ «նաղդով», ոչ «նիսյայով», ժողովրդին գումար չենք խոստացել… Հրայր Անտոնյանին ես եմ խնդրել անձամբ ընդունել Նիկոլ Փաշինյանին՝ որպես պատգամավորի եւ հայ մարդու, թեեւ ՀՀԿ շտաբերում պարտավոր չեն մեր չսպասված հյուրերին դիմավորել»,-համոզմունք հայտնեց Էդուարդ Շարմազանովը:
Անդրադառնալով Նիկոլ Փաշինյանի այն ահազանգերին, թե ՀՀԿ շտաբերում կուտակումներ են, Էդուարդ Շարմազանովը նկատեց. «Մեր թեկնածուի ժողովրդականությունն այնքան բարձր է, որ մեր համախոհներն ու ակտիվիստները լինում են շտաբերում»:
Թե ինչու են Տարոն Մարգարյանի երկու նախընտրական շտաբերի ներկայացուցիչներն ագրեսիվ գտնվել «ԵԼՔ-ի ներկայացուցիչների հանդեպ, Շարմազանովի խոսքով. «Ագրեսիվ են արձագանքել անկոչ հյուրերը, որոնք գնացել էին մեր շտաբ»:
Լուիզա ՍՈՒՔԻԱՍՅԱՆ
