Ուշադիր եղեք առաջին օգնություն ցուցաբերելիս
Գիտակցության կորստի դեպքում մկանները, այդ թվում՝ նաեւ լեզուն, թուլանում են, եւ եթե տուժածը պառկած է մեջքի վրա, լեզուն հետ է գնում դեպի ըմպան՝ փակելով շնչուղիները։ Քանի որ անգիտակից տուժածի մոտ բացակայում են կլման եւ հազի ռեֆլեքսները՝ փսխման զանգվածները, այլ հեղուկները (արյուն, թուք, լորձ եւ այլն) կամ օտար մարմինը կարող են խցանել նրա շնչուղիները եւ մահվան պատճառ հանդիսանալ։ Ստուգեք գիտակցության առկայությունը՝
1. Տվեք պարզ հարց կամ հրահանգ՝ «ի՞նչ է անունդ» կամ՝ «բացիր աչքերդ»։
2. Եթե կասկածում եք, որ ստացել է գլխի կամ պարանոցի վնասվածք, ապա տուժածին տեղաշարժեք միայն խիստ անհրաժեշտության դեպքում։
Շնչառությունը ստուգելիս նախ հետեւեք կրծքավանդակի շարժումներին, ապա լսեք շնչառությունը կամ զգացեք շնչառությունը՝ ձեր այտը մոտեցնելով տուժածի քիթ-բերանին։
Զանգահարեք շտապօգնություն կամ խնդրեք որեւէ մեկին զանգահարել։
Առաջին օգնություն
Եթե բացակայում է գիտակցությունը.
1. Շրջեք տուժածին՝ բերելով նրան կողքի դիրքի։
2. Բացեք վերին շնչուղիները՝ գլուխը հետ թեքելով կամ բարձրացնելով ստորին ծնոտը։
3. Եթե բացակայում է շնչառությունը, ապա սկսեք թոքերի արհեստական օդափոխություն։
4. Եթե բացակայում է գիտակցությունը, բայց առկա է շնչառությունը, եւ չկան գլխի եւ պարանոցի վնասվածքներ, ապա տուժածին շրջեք կողքի։
5. Վերահսկեք տուժածի վիճակը (շնչառությունը եւ անոթազարկը) մինչեւ շտապօգնության ժամանումը։
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ»
10.07.2017
