«Նատալի ֆարմ» ընկերությունը Մալայանի ակնաբուժական կենտրոնում տեղի ունեցած միջադեպի մասին հայտարարություն է տարածել:
Մալայանի անվան ակնաբուժական բժշկական կենտրոնում որոշ հիվանդների աչքերում դեղորայքի ներարկումից հետո նրանց մոտ առաջացած տեսողական խնդիրների մասին բուժկենտրոնի տնօրեն Ալեքսանդր Մալայանն ասել է, որ 7 հիվանդ, որոնք այցելել էին կենտրոն՝ աչքի մեջ ներարկում ստանալու, շաքարախտով հիվանդներ են: Իսկ խնդիրն առաջացել է, ըստ բժշկի, ինֆեկցիայի պատճառով:
Ըստ բժշկի՝ «Հիվանդները վիրահատված են, տեսողությունը վերականգնված է: 5-ը վիրահատվել են, 2-ի վիճակը դեղորաքային բուժումով ենք լավացրել: Կուրություն չկա»: Հիվանդների հարազատները հայտարարել են, որ դեղի ներարկումից հետո հիվանդների մոտ կուրություն է առաջացել: Մալայանը մեզ հետ զրույցում վստահեցրել է, որ խնդիրը վերացվել է, հիվանդները վիրահատվել են եւ տեսողությունը վերականգնվել է:
Խոսքը Avastin դեղամիջոցի մասին է, որը ներմուծում է «Նատալի ֆարմը»: Մալայանը, թեեւ դեղամիջոցի անուն չի տվել, նշելով՝ այս պահին քննություն է գնում, վաղը ուսումնասիրության արդյունքները պարզ կլինեն:
Կարդացեք նաև
Այս առնչությամբ «Նատալի ֆարմ» ընկերությունը հայտնում է. «Avastin դեղամիջոցը նախատեսված չէր ներակնային ներարկման համար: Այսօր տեղեկացանք, որ Մալայանի անվան ակնաբուժական բժշկական կենտրոնում 8 բուժառու կանգնել են տեսողության բարդ խնդրի առաջ՝ «Նատալի ֆարմ» ընկերությունից ձեռքբերված դեղամիջոցի կիրառման արդյունքում»։ Ըստ ընկերության հայտարարության՝ լրատվամիջոցներից մեկը նշել էր, որ հետազոտման արդյունքում դեղի մեջ հայտնաբերվել է ինֆեկցիա, ինչն էլ հանդիսացել է հիվանդների մոտ տեսողության վատացման պատճառ. «Մենք տեղեկացանք, որ խոսքը Շվեյցարական Ռոշ ընկերության Avastin դեղամիջոցի մասին է, որը կիրառվել է ներակնային ներարկման եղանակով։
Նախ` պետք է փաստենք, որ տվյալ դեղամիջոցը ըստ ՀՀ-ում գրանցված կիրառման ցուցումների՝ նախատեսված չէ ներակնային ներարկման համար եւ, եթե բժիշկը ստանձնում է դրա ներարկումը, ապա ինքն է ամբողջությամբ կրում բոլոր բարդությունների և կողմնակի ազդեցությունների պատասխանատվությունը։
Պետք է նշել, որ դեղի մեկ սրվակի պարունակությունը կարող է կիրառվել մի քանի հիվանդի համար, սակայն, դեղը պետք է կիրառել անմիջապես սրվակը բացելուց հետո եւ դեն նետել։ Եթե պրոցեդուրան չի արվել նույն պահին, այլ դեղը կիրառվել է մի քանի օրվա ընթացքում, ապա, այո, բաց սրվակի մեջ կարող էր ինֆեկցիա փոխանցվել։
Նշված հետազոտությունը, հավանաբար, արվել է հենց տվյալ բաց սրվակից, սակայն, փակ սրվակն ուսումնասիրելու պարագայում, եթե կրկին հաստատվի վարակի առկայությունը, ինչը քիչ հավանական է՝ հաշվի առնելով դեղն արտադրող ընկերության բարձր վարկանիշն ու փորձը, ապա անհրաժեշտ կլինի խնդիրը ներկայացնել ոչ թե «Նատալի ֆարմ» ընկերությանը, այլ անմիջապես դեղն արտադրողին՝ Շվեյցարական Ռոշ ընկերությանը։
Ցանկացած դեպքում «Նատալի ֆարմ» ընկերությունը ոչ մի պատասխանատվություն չի կրում, քանի որ այն հանդիսանում է զուտ ներկրող ընկերություն։
Ցավում ենք հիվանդներին հասցված առողջական վնասի համար եւ մաղթում ենք շուտափույթ ապաքինում»։
Նելլի ԲԱԲԱՅԱՆ
