Մարտի 6-ին նշվում է կոլումբացի վիպագիր, սցենարիստ և լրագրող Գաբրիել Գարսիա Մարկեսի ծննդյան օրը։
Այդ առիթով «Լոֆթ» ինքնազարգացման կենտրոնը և «Անտարես» հրատարակչությունը նախաձեռնել էին «Մարկեսյան ընթրիք» խորագրով միջոցառում:
Ընթրիքին, ի թիվս այլոց, ներկա էին գրականագետ, «Անտարես» հրատարակչության գլխավոր խմբագիր Արքմենիկ Նիկողոսյանը, թարգմանիչ, կինոգետ, մարկեսյան գրքերի խմբագիր Զավեն Բոյաջյանը, թարգմանիչներ Ռուզաննա Պետրոսյանը, Կառա Չոբանյանը։
Կարդացեք նաև
Նրանք գինու սեղանի շուրջ քննարկվեցին Գաբրիել Գարսիա Մարկեսի նոր թարգմանությունները, խոսվեց նոր հրատարակությունների մասին:
«Մարկեսի գործերը համարվում են բեսթսելլերներ և դրա համար առանձնահատուկ հպարտանալու առիթ կա, քանի որ բարձրակարգ թարգմանություններ և հրաշալի գրքեր են հրամցվում հայ ընթերցողին ու ստանում ենք փոխադարձ լավ արձագանքը, ինչն էլ ուրախացնում է մեզ», -իր խոսքում նշեց հրատարակչության գլխավոր խմբագիր Արքմենիկ Նիկողոսյանը։
Երեկոյի ընթացքում անցկացվեց Մարկեսի «Հարյուր տարվա մենություն», «Նահապետի աշունը», «Հուշագրություն իմ տխուր պոռնիկների մասին», «Գնդապետին գրող չկա», «Երեքշաբթի օրվա սիեստան», «Հայտարարված սպանության քրոնիկոն», «Սերը խոլերայի ժամանակ» գրքերի հայերեն թարգմանությունների շնորհանդեսը, որոնք լույս է ընծայել «Անտարեսը»-ը:
Հարկ է նշել, որ 2014 թվականի ապրիլին՝ Գարսիա Մարկեսի մահից հետո, Կոլումբիայի նախագահ Խուան Մանուել Սանտոսը նրան անվանել է «երբևէ ապրած ամենանշանավոր կոլումբիացին»։
Մոնիկա ԳՐԻԳՈՐՅԱՆ
