«Զանգեզուրի միջանցքի» հարցը պետք է փակված լիներ Արցախի հանձնումից հետո եւ այդ թեման այլեւս գոյություն չպետք է ունենար: Ես մեկ շեշտադրում անեմ աշխարհաքաղաքական կոնտեքստի առումով: Ինքն իրենով այդ թեման հենց սկսում է ապրել, դա նշանակում է, որ դու քո տարածքը վիճելի տարածք ես դարձնում, ինքը իրենով դիտվում է որպես վիճելի տարածք, որովհետեւ այլ պետություններ իրար հետ քննարկում են քո տարածքով միջանցք ձեւավորելը: Միացյալ Նահանգներն են քննարկում Թուրքիայի հետ, Թուրքիան՝ Ադրբեջանի հետ բազմաթիվ հայտարարություններ, եւ դու այս թեմայում չկաս: Սա իսկապես այն տարբերակն է, որ դու ոչ թե սեղանի շուրջն ես, այլ մենյուի մեջ ես, աշխարհաքաղաքական մենյուի մեջ:
Հիմա փորձում են ներկայացնել, թե սա ինչ օգուտներ կարող է բերել Հայաստանին: Երեկ, թե մի երկու օր առաջ, մեր հայտնի «դաշնամուր նվագողը», խոսքը այսպես կոչված նախագահի մասին է, ասաց, թե Սյունիքի դարպասները պետք է բացենք:
Մի քանի օր առաջ Թուրքիայի նախագահը հայտարարեց, որ $ 2 միլիարդ 800 միլիոն գումար է հատկացվում Ղարս-Իդլիպ-Նախիջեւան երկաթուղի կառուցելու համար: Սա նշանակում է, որ ենթադրյալ այդ ճանապարհով երկաթուղին ոչ թե գալու է Երասխով Հայաստան եւ Հայաստանի տարածքով հետո մտնի Թուրքիա, այլ ուղղակի Նախիջեւանից մտնելու է Թուրքիա՝ Իդլիբ-Կարս: Եվ ընդհանրապես ճանապարհների բացման հետ այդ ճանապարհը ոչ մի առնչություն չի ունենալու:
Սա լինելու է Թուրքիա-Ադրբեջան-Կենտրոնական Ասիա երկրների հետ կապն ապահովող միջանցք: Հայաստանի օգուտն այստեղ ինչի՞ մեջ է, չի երեւում: Յուրաքանչյուր մտածող մարդ պետք է վերցնի քարտեզը, նայի եւ ասի՝ լավ, մենք այստեղ ի՞նչ ենք շահում: 42 կմ-անոց ինչ-որ տրանզիտային մուտքե՞ր: Որ սա լինելու է միջանցքի տարբերակ, ես չեմ կասկածում: Մինչ այսօր բոլոր հայտարարությունները, որ անում էին Ադրբեջանում, ավելի ճիշտ էին դուրս գալիս, քան այն հայտարարությունները, որ արվում էին Փաշինյանի կողմից: Մեր նախորդ փորձը հուշում է, որ սա այդպես է լինելու:
Կարդացեք նաև
Եթե խոսքը արտապատվիրակման մասին է, չի կարող պետությունը իր ֆունկցիաները պատվիրակել մասնավոր ընկերության: Սա պետական ֆունկցիա է: Համեմատությունները օդանավակայանների հետ աբսուրդ են: «Զվարթնոցն» ուղղակի բիզնես է: Բայց այդ տարածքը ամբողջությամբ գտնվում է քո վերահսկողության տակ»,-ասաց ՀՀ երկրորդ նախագահ Ռոբերտ Քոչարյանը «Հայլուր» հարցազրույցի շրջանակներում պատասխանելով «Զանգեզուրի միջանցքի» եւ դրա վերահսկողությունը ինչ-որ մասնավորի արտապատվիրակելու՝ իշխանության նպատակների մասին հարցին:
Աշոտ ՀԱԿՈԲՅԱՆ
