Հիվանդությունների վերահսկման և կանխարգելման ազգային կենտրոնը հայտնում է, որ սեպտեմբերի 9-ին Վայոց ձորի մարզի բնակչի մոտ ախտորոշվել է «Մենինգիտ, մենինգոկոկցեմիա»:
Նա հոսպիտալացվել է ծանր վիճակով, սակայն, ցավոք, հաջորդ օրը հիվանդի մոտ արձանագրվել է կենսաբանական մահ:
Համաճարակաբանական հետազոտությունը և վարակի տարածման կանխարգելմանն ուղղված բոլոր անհրաժեշտ միջոցառումները իրականացված են: Սերտ կոնտակտավորների շրջանում հսկողությունը շարունակվում է տնայցերով:
Ի՞նչ է մենինգոկոկային վարակը
Այն սուր վարակիչ հիվանդություն է, որը հարուցվում է մենինգոկոկերի կողմից։
Ինչպե՞ս է փոխանցվում վարակը
Վարակը փոխանցվում է օդակաթիլային ճանապարհով: Բնակչության 1-10%-ը կրում են մենինգոկոկային մանրէն բկանցքում առանց որևէ ախտանշանի և կարող են վարակը փոխանցել այլ անձանց։
Ախտանշանները
– Բարձր ջերմություն
– Ուժեղ գլխացավ, պարանոցի կարկամում
– Սրտխառնոց, փսխում
– Թուլություն, քնկոտություն կամ գիտակցության խանգարում և ցնցում
– Մաշկի վրա հատուկ կարմիր-մանուշակագույն ցան (ավելի ուշ փուլում)
Ինչպե՞ս պաշտպանվել մենինգոկոկային վարակից
Առկա է մենինգոկոկային վարակից պաշտպանվելու 2 տարբերակ.
– Պատվաստում
– Կանխարգելիչ հակաբիոտիկոթերապիա։
Հիվանդությունների վերահսկման և կանխարգելման Ազգային Կենտրոն
