«Մինսկի խմբի երկրները շատ լավ գիտեն իրենց շահերը եւ առաջնորդվում են դրանցով: Ցանկացած հայտարարություն բխում է այդ երկրների շահերից»,-«Տեսակետ» մամուլի ակումբում այսօր անդրադառնալով ԵԱՀԿ Մինսկի խմբի՝ տարածաշրջանային այցն ամփոփող հայտարարությանը, ասաց Մարդկային զարգացման միջազգային կենտրոնի նախագահ, ԱԺ նախկին պատգամավոր Թեւան Պողոսյանը:
Հիշեցնենք, որ ԵԱՀԿ Մինսկի խմբի համանախագահները կոչ են արել Ադրբեջանի ղեկավարությանը Լեռնային Ղարաբաղի հակամարտության շփման գծում խուսափել հետագա լարվածությունից: Նրանք նույն կոչն են հղել նաեւ ՀՀ եւ ԼՂՀ իշխանություններին: «Հասցեականությունը պետք է հիմնված լինի իրական ազդեցության վրա: Նախորդ հայտարարության մեջ նշվում էր, որ Ադրբեջանն առաջինն է կրակել, բայց եւ ասվում էր, որ ՀՀ-ն պատասխանել է»,-նկատեց Թեւան Պողոսյանը:
Նա նշեց՝ Մինսկի խմբի երեկվա հայտարարությունը եղավ այն ժամանակ, երբ հայկական կողմը պատասխան էր տալիս հակառակորդին, թեեւ այդ մասին տեսանյութ դեռ չկա:
«Մեկ տարի առաջ պայմանավորվեցին հետաքննության մեխանիզմների մասին: Ո՞ւմ պատճառով դրանք կյանքի չեն կոչվում՝ Ադրբեջանի: Մենք ինչ-որ բան անու՞մ ենք դա աշխարհին ներկայացնելու համար: Երեք հզոր երկրներ չեն կարողանում դա կյանի կոչել: Չկան հետաքննության մեխանիզմներ, ուրեմն պետք է ասել՝ ցանկացած տեղում տեսնեմ երեք իրար գլուխ հավաքված ադրբեջանցու՝ վերացնելու եմ եւ պատասխանատվությունը ձեր վրա է, որովհետեւ չեք կարողանում դրա դեմն առնել»,-ասաց Թեւան Պողոսյանը:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
