Երեկ «Հայաստան» մարզական միության մարզադահլիճում անցկացվեց հանրապետության քրեակատարողական հիմնարկների դատապարտյալների սեղանի թենիսի առաջնության եզրափակիչը:
Կանանց պայքարում մրցանակային եռյակը կազմեցին Աբովյանի ՔԿՀ դատապարտյալներ Քրիստինա Պետրոսյանը, Գոհար Կարապետյանը եւ Դիանա Հարությունյանը: Տղամարդկանց մեջ հաղթող դարձավ Կարեն Գաբրիելյանը («Կոշ» ՔԿՀ), որը վճռական պայքարում պարտության մատնեց «Սեւան» ՔԿՀ-ից Գեւորգ Մակիչյանին: Երրորդը Վարոս Շահբազյանն էր («Կոշ» ՔԿՀ):
ՀՀ արդարադատության նախարար Գեւորգ Դանիելյանը մրցանակակիրներին հանձնեց դիպլոմներ եւ նվերներ, իսկ եզրափակիչ մրցաշարին մասնակցած բոլոր դատապարտյալներին՝ նյութական մրցանակներ:
Մրցումների ավարտին նախարարը պատասխանեց «Առավոտի» հարցերին:
– Վերջին շրջանում ՔԿՀ դատապարտյալների միջեւ մարզական միջոցառումներ հաճախակի են անցկացվում: Դրանք ինչ-որ ձեւով ներազդո՞ւմ են նրանց վրա:
– Անշուշտ: Եվ ես անձամբ համարում եմ, որ այս մրցումներն անհրաժեշտ են: Դրանք սոցիալ-հասարակական մեծ նշանակություն ունեն դատապարտյալների հոգեբանության վրա դրականորեն ներազդելու, նրանց հասարակություն վերադառնալը հնարավորինս մատչելի դարձնելու հարցերում: Հիմա մտածում ենք այսպիսի միջոցառումները ոչ միայն շարունակական դարձնելու, այլեւ դրանց նոր երանգներ հաղորդելու ուղղությամբ: Այդ նպատակով մենք նոր նախաձեռնություններ պետք է հանդես բերենք:
– Մարզաձեւերի ընտրությունը կատարվում է դատապարտյալների նախասիրություննե՞րը հաշվի առնելով, թե՞ պայմանների եւ գույքի առկայությունը:
– Ցավոք, առայժմ ստիպված ենք ավելի շատ առաջնորդվել երկրորդով: Դուք ներկա եք լինում միայն եզրափակիչներին: Բայց դրանից առաջ տեղերում անցկացվում են ներհիմնարկային ընտրական մրցումներ: Այդպես եղել է ինչպես այս անգամ, այնպես էլ շախմատի եւ ֆուտբոլի մրցումների ժամանակ: Սակայն նախատեսել ենք հետագայում բոլոր ՔԿՀ-ների համար նոր մարզագույք ձեռք բերել՝ ծրագիրն ավելի բազմազան դարձնելու համար:
– Հաջողակներին խրախուսելու մեջ, ասենք, պատժաչափի մեղմացում չի՞ նախատեսվում:
– Պատժի մեղմացումը նախարարից չի կախված: Գոյություն ունեն համապատասխան ընթացակարգեր: Սակայն մասնակիցներից նրանք, ովքեր կարգապահական տույժեր չունեն, այս մրցումները մեզ՝ համապատասխան անկախ հանձնաժողովներին, մարզիկների մասին դրական եզրակացություններ տալու հնարավորություն են տալիս, ինչը, իհարկե, իր իրավական հետեւանքները կարող է ունենալ:
– Դատապարտյալներին ՔԿՀ-ներից մրցավայր եւ ետ տեղափոխելը, անկասկած, հեշտ չէ: Առանձնապես վտանգավորներին, ցմահ դատապարտվածներին նման միջոցառումների մասնակցել թույլատրվո՞ւմ է:
– Իսկ ինչո՞ւ ոչ: Այդպիսի սահմանափակում չկա:
Հ. Գ. Մրցումերի ավարտին եզրափակիչ մրցաշարի մասնակից 30 դատապարտյալներին հարազատների հետ արտահերթ տեսակցության հնարավորություն ընձեռվեց: