![\"\"](\"https://www.aravot.am/2009/aravot_arm/April/15/p19.jpg\")
Հյուսիսային Կորեան շարունակելու է զարգացնել միջուկային զսպման ուժերը եւ միջուկային հետազոտությունները: Փհենյանը նաեւ հայտարարել է, որ դուրս է գալիս 6 երկրների մասնակցությամբ ընթացող միջուկային զինաթափման վերաբերյալ բանակցություններից: Այդ երկրի իշխանությունները հայտարարեցին, որ նման բանակցությունները համարում են անիմաստ եւ անօգուտ: «Մենք այլեւս երբեք չենք մասնակցի այդպիսի բանակցությունների եւ մեզ կապված չենք զգա նման բանակցություններում ձեռք բերված պայմանավորվածություններով»,- ասված է Հյուսիսային Կորեայի արտգործնախարարության հայտարարության մեջ: Այդպիսով, Փհենյանը պաշտոնապես դուրս է գալիս Ռուսաստանի, ԱՄՆ-ի, Չինաստանի, Ճապոնիայի եւ Հարավային Կորեայի բանակցություների ֆորմատից, որը ձեւավորվել է դեռեւս 2003 թվականին: Հյուսիսային Կորեայի նման հայտարարությունները պայմանավորված են նրանով, որ օրերս ՄԱԿ-ի անվտանգության խորհուրդը միաձայն դատապարտել է Փհենյանի միջուկային հավակնությունները եւ սպառնացել է խստացնել պատժամիջոցները, մասնավորապես ընդլայնել այն ապրանքների ցանկը, որոնք արգելված է ներմուծել տվյալ երկիր:
