Լեհաստանում ադրբեջանական համայնքի ներկայացուցիչների և այդ երկրում Ադրբեջանի դեսպանատան ձեռնարկած միջոցառումների շնորհիվ հաջողվել է կանխել Ադրբեջանի դեմ ուղղված սադրանքը, գրում են ադրբեջանական լրատվամիջոցները։ Բաքուն, մասնավորապես, սադրանք է անվանել Լեհաստանում արտադրանքի վրա Արցախի դրոշի պատկերը։
Նշվում է, թե այն բանից հետո, երբ ադրբեջանական համայնքի ներկայացուցիչները սոցիալական ցանցերում տեղեկություն են տարածել Լեհաստանի շուկայում Արցախի դրոշի պատկերով տեղական արտադրության ապրանքների վաճառքի մասին, Լեհաստանում Ադրբեջանի դեսպանատունը միջոցներ է ձեռնարկել այդ արտադրանքի թողարկումը դադարեցնելու և այն վաճառքից հանելու ուղղությամբ։
Նշվում է, որ արտադրանքը վաճառող Henry ընկերության տնօրեն Չեզարի Պոպելի հետ կապ են հաստատել և բողոք հայտնել Ադրբեջանի անունից։
Ադրբեջանական լրատվամիջոցների փոխանցմամբ՝ նա ասել է, թե «խնդրի մասին տեղեկացել է սոցիալական ցանցերից, ափսոսանք է հայտնել, ներողություն խնդրել թույլ տրված սխալի համար և հայտարարել, որ որոշում է կայացվել դադարեցնել նշված արտադրանքի վաճառքը»։
Կարդացեք նաև
Ադրբեջանական կողմի հաղորդմամբ՝ դեսպանատան առաջարկով Պոպելը գրավոր տեղեկացրել է դիվանագիտական ներկայացուցչությանը ձեռնարկված միջոցառումների մասին։
Նամակում նշվում է, թե տպագիր նյութերում Արցախի խորհրդանիշի պատկերի օգտագործումը նպատակաուղղված կամ կանխամտածված չի եղել, և տպագրության նախապատրաստման փուլում տեղի է ունեցել «մարդկային գործոնի» հետևանքով։
Նշվում է նաև, որ վաճառքն ամբողջությամբ դադարեցվել է, պահեստում գտնվող բոլոր օրինակները, ինչպես նաև հաճախորդների կողմից վերադարձված ապրանքները շրջանառությունից հանվելու և ոչնչացվելու են։ Բացի այդ, փոփոխություններ են կատարվել՝ հետագա տպագիր նյութերում այդ պատկերի օգտագործումը բացառելու համար։
