Ըստ «Ա1+»-ի՝ ներկայումս «Նաիրիտ» գործարանը արտադրանք չի տալիս: «Նաիրիտի» մամուլի եւ հասարակայնության հետ կապերի վարչության պետ Անուշ Հարությունյանը ասել է, որ «պատճառները խիստ տարբեր են, հիմա չեմ կարող նշել»: Բայց, չնայած արտադրանքի բացակայությանը, Ա. Հարությունյանը վստահեցրել է, որ գործարանի աշխատակիցները հարկադիր պարապուրդում չեն:
Մարտի կեսերին հոսանքի անջատումների պատճառով դադարեցվել էր գործարանի աշխատանքը: Պատճառը «Հայաստանի էլեկտրացանցերին» գործարանի ունեցած պարտքն է եղել: Պարտքի չափի մասին տարբեր տվյալներ են «Ա1+»-ին հաղորդել «Նաիրիտից» եւ ՀԷՑ-ից: Առաջինին դեպքում ասել են, թե պարտքը անջատման ժամանակ կազմել է 829 միլիոն դրամ, իսկ ՀԷՑ-ից տեղեկացրել են, որ մարտի 1-ի դրությամբ «Նաիրիտի» պարտքը կազմել է 1 մլրդ դրամ:
