Օգոստոսի 27-ից մեկնարկել է որսաշրջանը եւ Կապանի տարածաշրջանում արդեն որսագողության երկու դեպք է արձանագրվել, ընդհանուր վնասը՝ 6,275 միլիոն դրամ:
Որսագողության առաջին դեպքի ժամանակ որսագողերի զոհ են դարձել Կարմիր գրքում գրանցված բեզոարյան երկու այծ, ընդհանուր վնասը՝ 6 միլիոն, իսկ երկրորդ դեպքի ժամանակ 55 կարմրախայտ ձուկ է որսագողերի ավար դարձել, ընդհանուր վնասը՝ 275 հազար դրամ: Երկու դեպքում էլ որսագողերը Կապանից են, քրեական գործեր է հարուցված, առգրավվել է 26 կգ այծի միս:
ՀՀ բնապահպանության նախարարության բնապահպանական պետական տեսչության Սյունիքի տարածքային բաժնի պետ Լեւոն Պետրոսյանը նշում է, որ սիրողական որսի սիրահարները պետք է օրինական որս կատարելու համար համապատասխան անդորրագիր ունենան: Լեւոն Պետրոսյանը խորհուրդ է տալիս զերծ մնալ անօրինական որս կատարելուց:
