Սամվել Բալասանյանին կընտրեն այն գյուղերում, որոնց հակակարկտային կայաններ է նվիրել
Ընտրողների համամասնությունն ապահովելու նպատակով ԿԸՀ-ն հետաքրքիր փոփոխություններ է կատարել Շիրակի մարզի ընտրատեղամասերում, օրինակ, ասենք, Գյումրու Արցախ թաղամասի 980 ընտրող ունեցող ընտրատեղամաս-մանկապարտեզը թիվ 34 ընտրատարածքից հանել ու մտցրել է թիվ 35-ի մեջ: Առաջին հայացքից սրա մեջ ոչ մի արտառոց բան չկա, սակայն փաստն այն է, որ կենտրոնական ընտրական հանձնաժողովը փորձում է կռիվ գցել երկու ԲՀԿ-ական պատգամավորների միջև: Արցախը այն թաղամասն է, որտեղ բնակվում է ԱԺ պատգամավոր, ԲՀԿ Շիրակի մարզային կառույցի պատասխանատու Մարտուն Գրիգորյանը, նա մեծամասնական կարգով պատգամավոր է ընտրվել հենց այստեղից` իր թաղի բնակիչների ձայներով, սակայն այժմ ստիպված է 980 թաղեցի ընտրողների նվիրել իր կուսակից ընկերոջը` ԱԺ փոխնախագահ Սամվել Բալասանյանին, ով մեծամասնական կարգով պատրաստվում է պատգամավոր դառնալ թիվ 35 ընտրատարածքից: Ու չնայած Aravot.am-ի հետ զրույցում Մարտուն Գրիգորյանի խորհրդական Աղասի Աբրահամյանը վստահեցրեց, որ պատգամավորը բացարձակապես չի նեղվում, քանի որ իրենից փոքր հատված է վերցված, այդուհանդերձ նկատենք, որ ի օգուտ Սամվել Բալասանյանի` թիվ 35 ընտրատարածքի կազմում ընդգրկվել են նաև այն գյուղերը, որտեղ ԲՀԿ-ական փոխնախագահը մեծ լավություն է արել, հակակարկտային կայանններ է տեղադրել: Արթիկն ու Մարալիկն ընդգրկող թիվ 36 ընտրատարածքից 35-ին են անցել 5 այդպիսի գյուղեր`Այգաբացը, Ղարիբջանյանը, Գետքը, Բայանդուրը, Երազգավորսը: Բացի Այգաբացից, թվարկված մյուս վայրերում Բալասանյանը հակակարկտայիններ է տեղադրել: Աժ փոխնախագահը հակարկատային է նվիրել նաև մոտ 500-600 քվերակող ունեցող Ախուրիկ համայնքին, որը նույնպես նոր փոփոխություններով մտցրել են այն ընտրատարածքի կազմում, որտեղից պատրաստվում է ընտրվել Սամվել Բալասանյանը: Ի դեպ, Ախուրիկը վերցրել են թիվ 33 ընտարատարածքի կազմից, այսիսիքն այնտեղից, որտեղից սովորաբար մեծամասնական կարգով պատգամավոր է ընտրվում հանրապետական Աշոտ Աղաբաբյանը: ՕԵԿ-ական Հովիկ Մարգարյանը ևս մեծամասնական կարգով այս ընտրատարածքից էր առաջադրվել, սակայն պատվեց Աշոտ Աղաբաբյանին:
Թիվ 34 Ընտրատարածքի նախագահը խորհուրդ է տալիս տարածքների վերաձեւումների մեջ միտում չտեսնել
Մենք փոփոխությունների հետ կապված պարզաբանումներ խնդրեցինք թիվ 34 ընտրատարածքային ընտրական հանձնաժողովի նախագահ Էդուարդ Բաղրամյանից: Պաշտոնյան տեղեկացրեց, որ դրանք անխուսափելի են` կապված փաստացի հաշվառման և Գյումրու Մուշ 2 նոր թաղամասի կառուցման հետ: Ըստ նրա, յուրաքանչյուր ընտրատարածքում բնակիչների աճ կամ նվազում է տեղի ունենում, ժամանակ առ ժամանակ մարդիկ դուրս են գրվում, նոր մարդիկ են գրանցվում: «Մանավանադ Գյումրիում ամեն ինչ խառն էր, մարդը փաստացի մի տեղ էր բնակվում, ասենք տնակում, բայց գրանցած էր իր հին, փլված շենքի հասցեով, կատարված փաստացի հաշվառումից հետո պատկերը հստակեցվեց. մարդու անձնագրի և բնակության վայրը պետք է համապատասախանեն: Փաստացի հաշվառումից հետո անհրաժեշտություն եղավ նման տեղաշարժեր կատարելու:Մուշ 2 թաղամասի շենքերը շահագործման հանձնելուց հետո էլ մեր` թիվ 34 ընտրատարածք եկան թիվ 33 ու 35 ընտրատարածքի ընտրողները, մեր թիվը բնականաբար ավելացավ , ընտրական օրենսգրքում նախատեսված թիվը գերազանացեց, հետևաբար և ԿԸՀ-ն բալանսի բերեց:Մի ընտրատեղամաս մեզանից վերցրեց, տվեց թիվ 35-ին: Ինչ-որ միտում էստեղ տեսնելը, ինչ-որ բանի հետ կապելը անիմաստ է», -ասում է Էդուարդ Բաղրամյանը:
Նունե ԱՐԵՎՇԱՏՅԱՆ
