«Դուք շատ սխալ ճանապարհի վրա եք, «Օրինաց երկիր» կուսակցությունը իր 15 տարվա կենսագրության մեջ երբեք ընտրակաշառքով չի առաջնորդվել ու պայքարելու է դրա դեմ: Իսկ ինչ մնում է , որ մեր կուսակցության տարածքային ղեկավարներն իրենց կուսակցական կանանց փոքրիկ նվերներ կամ մոտեցումներ են ցուցաբերում իրենց ճաշակով՝ դա իրենց խնդիրն է»,- Aravot.am-ի հարցին, թե ինչպես է ՕԵԿ-ը կոչ անում կոպեկներով ձայները չվաճառել, երբ մամուլի հրապարակումների համաձայն, ՕԵԿ-ը ջեմերով ու մուրաբաներով քաղաքացիներից ձայներ է հավաքում՝ պատասխանեց կուսակցության փոխնախագահ Հեղինե Բիշարյանը:
Լրագրողներից մեկի դիտարկմանն ի պատասխան, թե խոսակցություններ կան, որ ՕԵԿ-ը սկսել է հավաքագրել ընտրողների անձնագրային տվյալները, տիկին Բիշարյանը վստահեցրեց, որ միշտ էլ ընտրողներին հորդորում են անձնագրերը չտրամադրել ոչ մի կուսակցության ներկայացուցչի. «Որովհետեւ դրանով ձեր գլխին այնպիսի մի բան կարող են սարքել, որ հետո ամբողջ կյանքում կարող եք զղջալ դրա համար»: Տիկին Բիշարյանն ասաց, որ ՕԵԿ-ը պայքարում է խայտառակ, լկտի, անօրինական երեւույթների դեմ:
Արփինե ՍԻՄՈՆՅԱՆ
