Երեւանի Կենտրոն եւ Նորք-Մարաշ վարչական շրջանների դատարանում՝ դատավոր Արշակ Վարդանյանի նախագահությամբ, շարունակվեց մեղադրանքի արհեստական ապացույցներ ստեղծելով՝ սուտ մատնության մեջ մեղադրվող քաղաքացի Արմեն Վարդանյանի դեմ գործով դատաքննությունը: Վերջինս, ի դեպ, չի ընդունում մեղադրանքը: «Փաստինֆոն», հղում անելով գործի նյութերին, տեղեկացնում է, որ ամբաստանյալը տարբեր պետական ատյաններ, այդ թվում՝ իրավապահ մարմիններ դիմում-բողոքներ է հղել, պնդելով, որ Հեռահաղորդակցության հանրապետական կենտրոն ՊՈԱԿ-ը շուկայականից ցածր գներով ապրանքներ է վաճառում, յուրացնում գումարները: Ըստ ՊՈԱԿ-ի տնօրեն Աշոտ Վերդյանի, ամբաստանյալին մեղսագրվող սուտ մատնության գործողությունը նպատակ ուներ ստիպել տնօրենին աշխատանքից ազատել Ա. Վարդանյանի նախկին աներոջն ու կնոջը՝ Սուրեն եւ Միլենա Մայիլյաններին, որպեսզի նրանք, առանց աշխատանքի մնալով, չկարողանան դատական կարգով ստանձնել երեխայի խնամակալությունը:
«Առավոտ» օրաթերթ
