Երեկ Շիրակի մարզի ընդհանուր իրավասության դատարանում սկսվեց Վարդան Ղուկասյանի դստեր փեսացուի սպանության գործով առաջին դատական նիստը: Լրագրողները սպանության մեջ մեղադրվող 29-ամյա Հարություն Սարգսյանի հորից` Անիի նախկին ոստիկանապետ Սամվել Սարգսյանից հարցրեցին` ինչպե՞ս կմեկնաբանի «խանդի հողի վրա կատարած սպանություն» ձևակերպումը, իր տղան երկրպագե՞լ է Վարդան Ղուկասյանի դստերը: «Ես բացառում եմ դա, ես չեմ կարող ավելորդ բառ խոսել, ըստ ինձ հասած տեղեկությունների, ոչ իմ տղաս է տեսել էդ աղջկան, ես դրանից հետո տղայիս տեսել, զրուցել եմ հետը, կասկած չունեմ, ոչ էլ պարոն Ղուկասյանի աղջիկն է տեսել, հիմա հերյուրանքներ են հանում: Եթե խանդ առաջանա մարդու մեջ, 3 տարբերակ գոյություն ունի. սա, իհարկե, խոսքը չի վերաբերում Վարդան Ղուկասյանի ընտանիքին, աղջիկներին, նաև իմ տղային` Հարությունին կամ որևէ մեկին, ես կյանքի օրինագիծն եմ ասում, օրինակ եմ բերում ուղղակի, կամ պետք է մեր բարբառով ասած, աղջկա հետ ֆռռացած լինի տղան, կամ սիրահարված լինի կամ էլ ինտիմ հարաբերությունների մեջ լինի, որ խանդ առաջանա , բոլորդ էլ կյանքի մարդիկ եք, չե՞ք հասկանում, որ դա բացառված: Ես Վարդան Ղուկասյանի կամ իր մերձավորների ու հատկապես իր աղջիկների հասցեին ոչ մի բացասական բան չեմ կարող ասել, և չգիտեմ, որ ասեմ, չեմ էլ լսել: Իրար չեն էլ ճանաչում, տղես պարզվում է ընտրյալ աղջիկ ունի, որը հիմա էլ սպասում է , որ ամուսնանան»,- ասաց Սամվել Սարգսյանը:
Նունե ԱՐԵՎՇԱՏՅԱՆ
