«Այսօր ունենք մտավախություն չկրկնելու նախորդ ընդդիմադիր ներկայացուցիչների սխալները: Ժամանակը եկել է իրերը իրենց անունով կոչելու: Սերժին կոչելով պարոն նախագահ, կարծում եմ, կոպիտ սխալ ենք անում»,-այսօր լրագրողների հետ հանդիպման ժամանակ հետընտրական գործընթացներից խոսեց Շուշիի առանձնակի գումարտակի նախկին հրամանատար Ժիրայր Սէֆիլյանը:
Նրա համոզմամբ՝ բեմահարթակում պետք է լինեն այն գործիչներն, ովքեր մեր ժողովրդի աչքին վարկաբեկված անձնավորություններ չեն: Մեր ժողովուրդն իր ոգեւորությամբ քաղաքական դասից առաջ է անցել:
Նախախորհրդարանի համակարգող, համակարգային վերլուծաբան Գարեգին Չուգասզյանի խոսքով՝ մենք հղի ենք անկախ պետության ծնունդով: Չունենալով անկախ երկրի ճարտարապետական նախագիծը մենք դարձանք անկախ պետության կրող: Նոր տաճարը չսարքած հին տաճարը չպետք է քանդել.
«Մենք կանխատեսել էինք, որ հերթական անգամ ժողովուրդը հայտնվելու է փակուղու առաջ: Ընտրակեղծիքի մեքենան վերածվել է մի խաղատան, որտեղ միշտ հաղթում է խաղատան տերը: Նախախորհրդարանը նպատակ դրեց ելք որոնել, որպեսզի հերթական մարտի 1-ից խուսափենք: Մեր երիտասարդությունը գիտակցություն ունի եւ գիտակցված պայքար է սկսվելու նոր գաղութային ռեժիմի դեմ»:
Գարեգին Չուգասզյանի պնդմամբ, ժողովուրդը կանգնած է ինքնակազմակերպման առաջ` լուծումները վերկուսակցական պետք է լինեն: Պայքարը չի գնում միայն քրեաօլիգարխիկ խմբի դեմ: Հայաստանի համար ընթացող ներկայիս քաղաքական ուժերի պայքարը հիմք է հանդիսանում հայաստանակենտրոն նոր խավի ձեւավորման համար: Մեր երկիրը ներքին առումով շատ կայուն է, սակայն կա 50 տզրուկային ընտանիքի խավ:
Իրավաբան Վարուժան Ավետիսյանն էլ կարծում է, որ ժողովուրդը փրկության յուրովի ճանապարհ է փնտրում, դրանցից մեկը արտագաղթն է: Այսօր չի կայանում պետությունն ու իր ժողովուրդը: Միակ ճանապարհը նոր կառավարման համակարգի ձեւավորումն է, պետք է ուրվագծվի ազգային կառավարման համակարգի պատկերը: Ժողովուրդը պետք է ինքնակազմակերպվի եւ ձեւավորի իր խորհրդարանը:
Անժելա ՇԱՀՈՒՄՅԱՆ
Խոզարածի տղուն որտեղ էլ տանես, մի 50 կամ 500 խոզ կգտնի, որ արածացնի;