Հայկական բալետային արվեստի երախտավորներ, անվանի մենապարողներ Հովհաննես Դիվանյանի եւ Ելենա Պավլիդիի դուստրը՝ Ազգային օպերային թատրոնի մենապարուհի, ՀՀ վաստակավոր արտիստ Մարիա Դիվանյանը երեկ Էգինայի դերապարով հանդես եկավ Յուրի Գրիգորովիչի խորեոգրաֆիայով Ա. Խաչատրյանի «Սպարտակ» բալետային ներկայացման մեջ, որը նվիրված էր Մարիայի բեմական-ստեղծագործական գործունեության 20-ամյակին: Անվանի մենապարուհին զբաղված է թատրոնի խաղացանկային բոլոր ներկայացումներում, հյուրախաղերով էլ հանդես է եկել արտերկրյա բազմաթիվ բեմերում:
Երեկ նրա Էգինան, ինչպես միշտ, փայլեց իր հմայքով ու բալետային արտիստին բնորոշ պլաստիկայով, ինչը այս պարուհու դեպքում անակնկալ չէր հանդիսատեսի համար: Ներկայացման ավարտից հետո հանդիսատեսին հուզող հարցն էլ, այն է՝ դեռեւս ինչքա՞ն ենք հմայվելու Մարիայի արվեստով, «Առավոտն» ուղղեց պարուհուն: Ստացանք հետեւյալ կարճ պատասխանը. «Եղել ու մնալու եմ ընդմիշտ՝ ձեր Մարիա Դիվանյան»:
Ս. Դ.
«Առավոտ» օրաթերթ
