Սրտաբան Տիգրան Պողոսյանն այսօր «Երկու երես» մամուլի ակումբում լրագրողների հետ հանդիպման ժամանակ ներկայացրեց սիրտ-անոթային հիվանդությունների առաջացման պատճառները եւ դրանց կանխարգելման միջոցները:
Տիգրան Պողոսյանի խոսքերով, սիրտ-անոթային հիվանդությունների առաջացման համար ամենառիսկայինը ժառանգական գործոնն է, որն անհնար է փոխել, սակայն կան մեթոդներ, որոնք կիրառելու դեպքում հնարավոր կլինի կանխարգելել հիվանդության զարգացումը:
«Սիրտ-անոթային հիվանդությունների կանխարգելման միջոցների մասին բոլորը լավ տեղեկացված են, ազգաբնակչության կողմից ընդամենը պահանջվում է ավելի շատ կամքի ուժ՝ կանոնները պահպանելու համար, այսինքն` առողջ ապրելակերպ, ճիշտ սնունդ, ֆիզիկական ակտիվություն, վնասակար սովորությունների, ինչպիսիք են ալկոհոլը եւ ծխելը, նվազեցում, որոնք սիրտ-անոթային համակարգի վրա ամենաբացասական ազդեցությունն ունեն»,-ասաց բժիշկը:
Ըստ սրտաբանի, սիրտ-անոթային հիվանդությունների առաջացման գործում մեծ քանակությամբ բացասական ազդեցություն ունեն նաեւ քրոնիկ հիվանդությունները, ինչպիսիք են շաքարային դիաբետը եւ բարձր զարկերակային ճնշումը:
Կարդացեք նաև
Տիգրան Պողոսյանը ճիշտ չի համարում այն տեսակետը, որ սրտանոթային հիվանդությունների վրա մեծ ազդեցություն ունի ամառվա շոգ եղանակը: Նա նշում է. «Անկախ եղանակային պայմաններից եւ այլ գործոններից, աշխարհում սիրտ-անոթային հիվանդությունները հանդիպման հաճախությամբ եւ մահացության բարձր թվերով զբաղեցնում են առաջին տեղը: Եղանակային փոփոխությունները՝ շոգը, ցուրտը, անձրեւային եղանակները կարող են միայն որոշ չափով նպաստել»: Բժշկի խոսքերով, շոգ եղանակը կարող է անդրադառնալ բոլորի վրա՝ հատկապես երեխաների եւ տարիքով մեծ մարդկանց վրա:
Խոսելով Հայաստանում սիրտ-անոթային հիվանդությունների պատճառների մասին, Տիգրան Պողոսյանը հայտարարեց, որ Հայաստանում եւ ընդհանրապես հայ հասարակության մոտ շատ են հանդիպում սրտային հիվանդությունները. «Մեր անամնեզին գենետիկորեն ծանրաբեռնված է սրտային հիվանդությունների առումով: Դա պայմանավորված է ոչ միայն գենետիկորեն, այլեւ գալիս է մեր սխալ ապրելակերպից: Ծխելու սովորությունը շատ է չարաշահվում մեր հասարակության կողմից, այդ իսկ պատճառով շատացել են սրտային հիվանդությունները եւ ավելի հաճախ նկատվում են երիտասարդների մոտ»:
Նա նաեւ կարծում է, որ մեկ այլ հանգամանք, որը նպաստում է հիվանդության զարգացմանը, բժշկին ուշ դիմելն է, ինչի պատճառով մարդիկ հետագայում տուժում են:
Օֆելյա ՀՈՎՀԱՆՆԻՍՅԱՆ
