Այսօր Վարչական դատարանի առջեւ «Կանխենք գազի սակագինը» նախաձեռնությունը գազի եւ էլեկտրաէներգիայի թանկացման հետ կապված բողոքի ակցիա էր կազմակերպել: 
Ակցիայի կազմակերպիչներից մեկը՝ Անդրիաս Ղուկասյանն ասաց, որ արդեն երրորդ հայցն են ներկայացնում Վարչական դատարան, քանի որ իրենց 2 հայցերը դատարանը մերժել է ընդունել: Ըստ Անդրիաս Ղուկասյանի, դատարանի պատճառաբանությունները ձեւական են. «Բոլորիս է հայտնի, որ գազի եւ էլեկտրաէներգիայի սակագնի բարձրացումը փոխկապակցված են միմյանց հետ, որովհետեւ նույն օրն է հանձնաժողովը կայացրել այդ որոշումները, մի որոշումը բխում է մյուս որոշումից: Դատարանը 2 անգամ դիմումը հետ է վերադարձրել՝ պատճառաբանելով, որ գազի սակագնի եւ էլեկտրաէներգիայի սակագնի հարցերը պետք է քննվեն առանձին վարույթով: Երկրորդ անգամ դիմեցինք՝ միջնորդելով, որ միասնական վարույթում այդ գործերը նայվեն, որովհետեւ էլեկտրաէներգիայի սակագնի փոփոխությունը հանձնաժողովի նախաձեռնությամբ է եղել: Իսկ այսօր մենք հետեւելով դատարանի պահանջին, ներկայացնում ենք այդ գործերն առանձին-առանձին: Եթե այս անգամ էլ չընդունվեց հայցադիմումները, արդեն հիմք կունենանք հայտարարել, որ Վարչական դատարանը պարզապես հրաժարվում է այս հարցն ուսումնասիրել»:
Aravot.am-ի հարցին՝ հիմա որքանո՞վ է ակտուալ գազի սակագնի թեման եւ ի՞նչ հույսեր կան, որ գազի թանկացման որոշումը կվերանայվի՝ Անդրիաս Ղուկասյանը պատասխանեց. «Այդ հարցը պետք է տաք ՀՀ քաղաքացիներին: Այս գների բարձրացումը, որ տեղի ունեցավ մեր երկրում, պիտի արձանագրենք, որ բարձրացել են ոչ միայն էներգակիրների գները, այլ սննդի եւ մյուս ծառայությունների: Այդ հարցը տվեք ՀՀ քաղաքացիներին՝ իրենք գո՞հ են այս իրադրությունից, պատրաս՞տ են հարմարվել եւ ապրել այսպես»:
Անդրիաս Ղուկասյանը նաեւ նշեց, որ իրենց նախաձեռնությունը հանդես է գալիս պահանջով, որ մեր երկրում սակագներին վերաբերող հարցերը որոշվեն բաց, թափանցիկ ընթացակարգերով, որտեղ հնարավորություն տան նաեւ հ/կ-ներին, հանրությանը հանդես գալ. «Մենք բոլորս տեսանք, որ հանրային սպառողների շահերը կարգավորող հանձնաժողովն անտեսել է օրենքի այդ պահանջները եւ հնարավորություն չի ստեղծել, որ հանրությունը նույնպես մասնակցի այդ սակագների որոշման հարցին: Դա հիմք է տվել վիճարկել այդ գործողությունները՝ դատական կարգով»:
Ակցիայի մասնակիցները զգուշացրեցին, որ եթե այս անգամ էլ դատարանը մերժի իրենց հայցը, իրենք կստեղծեն այլընտրանքային իրենց դատարանը՝ հանրային դատարան եւ այդ հայցը կքննեն այդ նոր դատարանի տիրույթում. «Դուք կհայտնվեք անօրինական դաշտում: Այդպիսի դատարան Հայաստանի Հանրապետությանը պետք չի, եթե չի ծառայում օրինականությանը եւ ժողովրդին»:
Կարդացեք նաև
Անդրիաս Ղուկասյանն ասաց, որ ոչ ոք հույս չի դնում մեր երկրում դատարանների վրա. «Մենք պարզապես անում ենք այն գործողությունները, որոնք անհրաժեշտ է անել, որպեսզի ցույց տանք հանրությանը եւ բոլորին, որ սպառված են եղել բոլոր իրավական ճանապարհները՝ այդ խնդիրները կարգավորելու: Հանրությունն ինքը պետք է որոշի՝ այդ հարցերն իրենց համար կարեւո՞ր են, թե՞ չէ: Մենք տեսանք, որ տրանսպորտի դեպքում միասնական գործողություններով հաջողվեց կանխել թանկացման որոշումը: Վստահ եմ, գազի սակագնի դեպքում նույնպես հնարավոր է: Թե չէ մեզ համար դատարանը որեւէ հեղինակություն չէ»:
Հռիփսիմե ՋԵԲԵՋՅԱՆ
Այ էս լավա… գազի լուսի դեմ ակցիյան, թոշակների բարձացման համարա պետք միաատել ակցյիա կազմակերպել… որ թոշակները բարձացնեն… մենակ թաքավոր դառնալու մասինեն մտածում…