Սոճուտների հատումն արգելվելու է դեկտեմբերի 13–ից սկսած և ամանորյա վաճառքի հանված սոճիները բերված են արտերկրից։ Այս օրենքը գործում է 2003 թվականից սկսած. Ամանորից մոտավորապես 20 օր շուտ սոճուտների հատումն արգելվում է։ Այս մասին հայտնեց ՀՀ գյուղատնտեսության նախարարության «Հայանտառ» ՊՈԱԿ–ի գլխավոր անտառապետ Ռուբեն Պետրոսյանը « ԷկոԼուր» մամուլի ակումբում այսօր կայացած ասուլիսի ժամանակ։
Նա նշեց նաև, որ նոյեմբերի 14–ին կառավարությունը ընդունել է որոշում, ըստ որի, եթե անձը կատարում է ծառահատում, ապա նա ստիպված է վերականգնել անտառը իր հատածի կրկնակի չափով։ Ինչպես նաև՝ ծառերը հատելու համար նախատեսված է տուգանք՝ սկսած 20–30 հազար դրամից, մինչև՝ 1500 դոլար։ Տուգանքի չափը կախված է այն հանգամանքից, թե ինչ ծառատեսակ է հատվում։
Ռ. Պետրոսյանն ավելացրեց նաև՝ «Համաշխարհային բանկ»–ի ուսումնասիրությունները ցույց են տվել, որ Հայաստանում ծառահատումների քանակը գնալով նվազում է. 2011 թվականին պաշտոնապես գրանցվել է 2520 դեպք, 2012 թվականին՝ 1320»։ Ռ. Պետրոսյանը կարծում է, որ նոյեմբերի 14–ի ընդունած որոշումը ևս կնպաստի ծառահատման նվազմանը։
Զառա ԱՍԿԱՐՅԱՆ
