Aravot.am-ը ՀՀ-ում Ֆրանսիայի դեսպան Անրի Ռենոյից հետաքրքրվեց՝ հնարավո՞ր է դեսպանատունն աջակցի ռեժիսոր Արմեն Մելիքսեթյանին՝ պրոֆեսիոնալ դերասանների հետ ֆրանսիացի որեւէ հեղինակի գործ բեմադրել: Փաստեցինք նաեւ, որ Ա. Մելիքսեթյանը, բացի Երեւանի կինոյի եւ թատրոնի ինստիտուտի բեմական շարժման եւ վոկալի ամբիոնի վարիչը լինելուց, տարիներ շարունակ ղեկավարել է Երեւանի Կամերային երաժշտական թատրոնը:
Պարոն դեսպանը շեշտեց, որ դեսպանատունը բաց է մշակութային ոլորտի առաջարկների համար, եւ պատրաստ՝ ուժերի ներածին չափով աջակցել հետաքրքիր գաղափարներին: Այդ պահին Արմեն Մելիքսեթյանն ասաց, որ Շարլ Ազնավուրը «Թուլուզ Լոտրեկ» մյուզիքլ ունի գրված, շատ կուզենար այն Հայաստանում բեմադրել: Մելիքսեթյանի խոսքով, աշխատանքներ են տարվում Ազնավուրի իմպրեսարիո Լեւոն Սայանից մյուզիքլը մեր երկրում բեմադրելու թույլտվություն ստանալու ուղղությամբ:
Անրի Ռենոն զարմացավ. «Չգիտեի, որ Ազնավուրը նաեւ մյուզիքլ է գրում: Ինձ համար դա բացահայտում էր, չնայած իր հանճարի գունապնակը պետք է հուշեր, որ նա կարող է մյուզիքլների հեղինակ լիներ: Երգիչ Ազնավուրին գիտեինք, դերասան Ազնավուրը տեսանք անցյալ տարի՝ «Ոսկե ծիրանի» պատվավոր հյուրն էր: Հաճույքով կծանոթանանք նաեւ մյուզիքլների հեղինակ Ազնավուրին»:
Գոհար ՀԱԿՈԲՅԱՆ
Լուսանկարում` «Օշական» համույթի ղեկավար Գրիգոր Առաքելյանը, ֆրանսիացի պարուսույց Կլոտիլդ Տրիադրիտտին եւ Արմեն Մելիքսեթյանը (աջից)
