Վոլոդյա Ավետիսյանի գործով դատական նիստը Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանում կրկին ընդմիջվել է. նիստերի դահլիճում թեժ վիճաբանություն է:
Վեճը սկսվեց այն բանից, երբ դատախազ Կարեն Հարությունյանը սկսեց ընթերցել քրեական գործին կցված ապացույցների՝ հեռախոսազրույցների ձայնագրության արձանագրությունը: Արա Զաքարյանը միջնորդեց դատախազի մատնանշած՝ քրեական գործով ձեռք բերված ապացույցները՝ հեռախոսազրույցների արձանագրությունը անթույլատրելի ճանաչելու մասին, ինչը դատարանը մերժեց, հիմնավորելով, որ Ավետիսյանի պաշտպանի միջնորդությունը հիմնավոր չէ ու ենթակա է մերժման, քանի որ այն կատարվել է օրենքով սահմանված կարգով եւ այդ ապացույցների օգտագործումը կնպաստի գործի օբյեկտիվ քննությանը:
Դատարանը մերժեց փաստաբանի մեկ այլ միջնորդություն՝ Վ. Ավետիսյանի հեռախոսազրույցները գաղտնի ձայնագրելու հիմքերը ներկայացնելու մասին, պնդելով, որ այս պահին նպատակահարմար չէ եւ դեռ պետք է ճշտվեն գործով կարեւոր հանգամանքներ:
Դատախազ Կարեն Հարությունյանը սկսեց ամսաթվերով ընթերցել Վոլոդյա Ավետիսյանի ու գործով վկաների հեռախոսազրույցների արձանագրությունները: Դրանք հիմնականում կենցաղային բնույթի էին եւ հարցուպատասխան՝ առողջության վերաբերյալ, 2 տուփ սուրճ բերելու եւ «այն գործով ինչ նորություն կա» թեմայի շրջանակներում: Դատախազի ընթերցման ժամանակ ազատամարտիկներից մեկը զայրացավ եւ պահանջեց դադարեցնել «հեքիաթ կարդալը»: Այս ազատամարտիկին միացան մյուսները եւ պահանջեցին ոչ թե հեռախոսազրույցների արձանագրությունը ընթերցել, այլ հեռախոսազրույցների ձայնագրությունները բերել դատարան, որ լսեն: Նախագահող Ավետիսյանը պահանջեց դուրս հանել, ըստ իրեն՝ դատական նիստը խանգարողներին, բայց կարգադրիչները չկարողացան ոչ ոքի դուրս հանել դահլիճից: Դատավոր Ավետիսյանը լքեց նիստերի դահլիճը, պնդելով, թե չի վերադառնա ու չի վերսկսի նիստը այնքան ժամանակ, մինչեւ ազատամարտիկները չազատեն նիստերի դահլիճը: Բայց ազատամարտիկները պնդեցին, որ իրենք չեն ազատելու նիստերի դահլիճը:
Կարդացեք նաև
Արփինե ՍԻՄՈՆՅԱՆ
