Գորիսի նստավայրում դեկտեմբերի 11-ի դատական նիստում շարունակվեց Թուրքիայի քաղաքացի Օսման Ուգուրլու և Վրաստանի քաղաքացի Ավթանդիլ Մատեաշվիլու գործով դատական նիստը: Սրտի վիրահատության պատճառով նախորդ նիստին չմասնակցած Հայկազ Հովհաննիսյանն այս անգամ ներկա էր նիստին: Ըստ Հայկազի, ինքը վարորդ է աշխատում տաքսի ծառայությունում: Այդ օրը կատարել է իրենց ծառայության պատվերը. Մեղրու մաքսակետից վերցրել է Օսման Ուգուրլուն և տեղափոխել Երևան` «Կոնգրես» հյուրանոց: Ճանապարհին իրար հետ չեն շփվել: Իսկ երբ վարորդը ճանապարհին կանգնեցնում էր մեքենան ջուր խմելու համար, թուրք ուղևորը անհանգստության նշաններ էր ցույց տալիս:
Վկայի ցուցմունքը լսելուց հետո դատարանն անցավ քրեական գործով եղած փաստաթղթերի հետազոտման աշխատանքին, փորձագետի եզրակացությանը, ըստ որի, մեքենայի կցորդի հատակում եղած թաքստոցի օտար մարմինը տնայնագործական եղանակով պատրաստած թմրանյութը հերոին տեսակի է: Զննվել են նաև Օսմանի իրերը: Կանաչ պայուսակում կային «Բիլայն»-ի 2 քարտեր, վճարման անդորրագիր, վիզա քարտ, այցեքարտեր, Օսմանի անձնագրի պատճենը, 2500 եվրո, բանալիներ և այլն: Իսկ այդ բանալիները Ավթանդիլի վարած մեքենայի բանալիների կրկնօրինակն էին: Իսկ մեքենան Օսմանի սեփականությունն է : Վրացի վարորդը բանալիների կրկնօրինակի մասին գաղափար անգամ չուներ: Ուստի և դատական նիստի մեծ մասն ընթացավ բանալիների շուրջ, քանի որ 2-րդ բանալիների Օսմանի կողմից գաղտնի պահելու գաղտնիքի բացահայտումը կարող էր նոր լույս սփռել գործի ընթացքի վրա: Դրա համար էլ Ավթանդիլի պաշտպանները հանդես եկան միջնորդությամբ, որը գրավոր ներկայացվեց դատարան: Միջնորդության մեջ նշվում է, ըստ վրացի վարորդի պաշտպան Հրաչ Հակոբյանի, Օսմանի պայուսակի մեջ հայտնաբերված կրկնօրինակված բանալիները իրեղեն ապացույց չեն գնահատվել նախաքննական մարմնի կողմից: Երկրորդ. վրացի վարորդը անմեղ է և պետք է դադարեցվի նրա հանդեպ քրեական հետապնդումը, վերացվի կալանքը`ազատ արձակելով նրան արգելանքից:
Այնուհետև հարցաքննվեց ամբաստանյալ Օսման Ուգուրլուն` պատասխանելով, թե դատավորի, թե մեղադրողի, թե վրացի վարորդի պաշտպանների հարցերին: Այն հարցին, թե ինչու Ավթանդիլին վերցրիք վարորդ, այն դեպքում, երբ դուք նույնպես վարորդ եք, Օսմանը թե` Ավթանդիլը փորձառու վարորդ է, Եվրոպան ճանաչում է, իսկ ինքը`ոչ:Նշենք, որ մեքենան ավազով էր բեռնված, իսկ թմրանյութը մեքենայի կցորդում պատրաստված թաքստոցում էր: Իսկ մեքենան, երբ կանգնել էր Իրանի սահմանակետի կայանատեղում, Օսմանի իմացած մարդկանցից մեկը` Նազիրը, եկավ, կայանատեղից մեքենան մի քանի ժամով տարավ և բերեց էլի նույն տեղը կանգնեցրեց: Նազիրը նաև զրոյացրել էր մեքենայի կմ- վազքը:Իսկ այդ ամենի մասին վարորդը ոչինչ չգիտեր: Թե ինչու են այդպես արել, Օսմանը թե` փաստաթուղթ էր պակասում:
Մեղադրող Արմեն Փանոսյանը Օսմանին դառնալով հարցրեց` եթե դուք տեղյակ չէիք, որ մեքենայի թաքստոցում օտար մարմին կա, ապա ինչու Մեղրու անցակետից տաքսիով շտապ Երևան մեկնեցիք: «Կասկած առաջացավ մեջս, որ Նազիրը կարող է ինչ-որ բան դրած լինի: Եթե իմանայի, որ թմրանյութ կա, Իրանում կմնայի, էլ ինչու պետք է Երևան գնայի»:
Նշենք, որ հաջողության դեպքում մեքենան կցորդով պետք է գնար Ուկրաինա, որտեղ և պետք է կցորդների փոխանակում կատարվեր: Այն հարցին, թե, եթե մեքենայի կցորդի թաքստոցում ապրանք չկար, ապա ինչ իմաստ ուներ կցորդներ փոխանակումը , Օսմանն ասաց` ես այդ կցորդը պետք է Իրան տանեի:
«Դատա՞րկ» :
«Այո»,-եղավ Օսմանի պատասխանը:
Վրացի վարորդ Ավթանդիլ Մատեաշվիլու պաշտպան Հրաչ Հակոբյանը որոշ դեպքերում նույն հարցը տարբեր ձևակերպումներով էր տալիս Օսմանին: Վերջինս էլ թե` նույն բաները մի հարցրեք:
Ալվարդ ՄԵՍՐՈՊՅԱՆ
Պարսիկը սարքի, հայը սարքի, խեղճ վրացի…