«Ցավալի է, որ Նորվեգիայի իշխանությունները Հայոց ցեղասպանության խնդիրը դիտարկում են քաղաքական շահախնդրության հարթությունում եւ փորձում են նման խնդրի շուրջ քաղաքական դիվիդենտներ հավաքել»,- Aravot.am-ի հետ զրույցում, անդրադառնալով Նորվեգիայի վարչապետ Էռնա Սոլբերգի հայտարարությանը, ասաց քաղաքագետ Հրանտ Մելիք-Շահնազարյանը:
Էռնա Սոլբերգը հայտարարել էր, որ ներկա չի գտնվի Հայոց ցեղասպանության 100-րդ տարելիցի ոգեկոչման արարողությանը, քանի որ կարեւորում է Նորվեգիայի եւ Թուրքիայի հարաբերությունները: Արարողությանը կմասնակցի միայն դեսպանը:
Հրանտ Մելիք-Շահնազարյանը համարում է, որ այդ հայտարարությունը խոսում է միայն Նորվեգիայի վարչապետի բարոյական նկարագրի մասին. «Ավելի լավ է՝ նման մարդիկ երբեք ներկա չլինեն ոգեկոչման արարողությանը: Ավելին ասեմ՝ դեսպանը կարող է հանգիստ չմասնակցել, եթե գերիշխանությունները հարցը դիտարկում են այդ ոլորտում: Սա Նորվեգիայի իշխանությունների գործն է, իրենց որոշելիքն է, Աստված իրենց հետ»:
Քաղաքագետը համոզմունք հայտնեց, որ բոլոր այն երկրների ղեկավարները եւ պատվիրակները, որոնք մասնակցելու են Հայոց ցեղասպանության 100-րդ տարելիցի ոգեկոչման արարողությանը, հարգանքի տուրք են մատուցելու ոչ թե շահախնդրությունից ելնելով, այլ՝ զուտ պատմական արդարության վերականգման համար եւ 1.5 միլիոն զոհերի հիշատակի ոգեշնչման համար. «Իհարկե՛, այդ ամենը քաղաքական հետեւանքներ կունենա: Առաջիկայում հիմնական կարեւոր գործոնն այն է, որ Հայկական հարցը՝ որպես Թուրքիայի հետ շփվելու գործոն, հետզհետե ուժեղանում է: Բայց այդ ամենը պայմանավորված չէ միայն մասնակցելով կամ չմասնակցելով, այլ պայմանավորված է այն հանգամանքով, որ Թուրքիան իր մերժողական քաղաքականությամբ խնդիր է դարձել ոչ միայն Հայաստանի, այլ նաեւ քաղաքակիրթ աշխարհի համար»:
Կարդացեք նաև
Ամի ՉԻՉԱԿՅԱՆ
