Հեղինակավոր ամերիկյան «New-York Times» թերթի լրագրող Սեթ Կուգելը «առանց Ադրբեջանին տեղեկացնելու» Լեռնային Ղարաբաղ այցելելու պատճառով հայտնվել է այդ երկրի արտաքին գործերի նախարարության անցանկալի անձանց ցուցակում: Այս մասին, ըստ «Взгляд»-ի, հայտարարել է Ադրբեջանի ԱԳՆ մամուլի խոսնակ Հիմքեթ Հաջիեւը:
«Այդ լրագրողի հոդվածը, որը խեղաթյուրում է այդ տարածքներում տիրող իրավիճակը, անհարգալից վերաբերմունք է թերթը ընթերցողների ու ավելի քան 1 միլիոն ադրբեջանցի փախստականների եւ բռնությամբ տեղահանվածների նկատմամբ, որոնք արյունալի էթնիկական զտումների են ենթարկվել: Ցավում ենք, որ «New-York Times» թերթում այդպիսի հոդված է հայտնվել»,- մասնավորապես ասել է Հաջիեւը:
Ադրբեջանի ԱԳՆ մամուլի խոսնակը նաեւ նշել է. «Կցանկանայի թերթի խմբագրությանը, որը կողմնակալ հոդված է հրապարակել եւ պատմել է տուրիստական ճամփորդությունների մասին Լեռնային Ղարաբաղում, որ այդ տարածքներում այնպիսի հանցագործություններ են կատարվում, ինչպիսիք են մարդկանց առեւտուրը, թմրանյութերի արտադրությունը եւ վաճառքը, զենքի անօրինական վաճառքը, ահաբեկիչների պատրաստությունը»:
Պատրաստեց Աշոտ ԻՍՐԱԵԼՅԱՆԸ
