Այսօր էկոնոմիկայի նախարարության կազմակերպած արդյունաբերական համաժողովում ներկայացվեց Եվրասիական տնտեսական միության անդամ պետությունների արդյունաբերական համագործակցության հիմնական ուղղությունների նախագիծը:
Համաժողովը ռուսերեն էր՝ առանց թարգմանության: Լրագրողները փոխնախարար Էմիլ Տարասյանից հետաքրրքվեցին՝ ինչու չկար համընթաց հայերեն թարգմանություն: Ըստ փոխնախարարի. «Այս քննարկումներն իրականացվում են աշխատանքային կարգով, նեղ մասնագիտական թարգմանության որոշակի խնդիրներ չառնելով, որովհետեւ տերմինոլոգիա է օգտագործվում, հենց ԵՏՄ պայմանագրի իրավական տերմինոլոգիան, դրա համար համաժողովի սկզբում ներողամտություն խնդրեցի ներկաներից»:
Անդրադառնալով արտահանման ծավալների կտրուկ նվազմանը՝ նա պատասխանեց հարցին, թե ինչպես է տեսնում հետագա համագործակցությունը ԵՏՄ-ի հետ, համաձա՞յն է, որ ԵՏՄ-ն հեռանկարներ չբացեց գործարարների համար:
«Դեռ շատ ժամանակ չի անցել, իսկ արդյունաբերական հզորությունները զարգացնելու համար կես տարին բավարար ժամանակաշրջան չէ: Այսօր խոսվում է հիմնական ուղղությունների եւ խոշոր արդյունաբերություն ունեցող ԵՏՄ անդամ երկրների հետ Հայաստանի համագործակցության ձևաչափի մասին:
Կարդացեք նաև
Ձևաչափերից մեկը կոոպերացիան է: Հասկանալով, որ մենք տրանսպորտի հետ կապված խնդիրներ ունենք, ծանր նյութերի ու հումքատար արտադրության կազմակերպման հարցերում, այստեղ խոսքը այն մասին է, որ Հայաստանը վերցնի արտադրական շղթայի մի մաս եւ մասնակցի: Օրինակ՝ եթե նույն Կալինինգրադի ազատ տնտեսական գոտիներում արտադրում են եվրոպական մակնիշի մեքենաներ, Հայաստանը կոմպլեկտավորման մասերի արտադրություն կազմակերպի ու մաս կազմի արտադրական շղթային: Ես մի ուղղություն ասացի, բայց խոսքը գնում է մի շարք այլ ուղղությունների մասին՝ շինարարության, թեթեւ արդյունաբերության եւ մնացած այլ ուղղությունների մասին, որոնցով Հայաստանը հետաքրքիր է ԵՏՄ-ին: Այդ մասով հայտ ենք ներկայացնում, որ մաս կազմենք խոշոր արտադրություններին»:
Անդրադառնալով ԵՏՄ հանձնաժողովի արդյունաբերության եւ ագրոարդյունաբերության նախարար, կոլեգիայի անդամ Սերգեյ Սիդորսկու ասածներին, թե Հայաստանը ընդհանուր սահմաններ չունի ԵՏՄ-ի հետ, ինչի արդյունքում կան որոշակի խնդիրներ, լրագրողներից մեկը հետաքրքրվեց, թե մասնավորապես ինչ խնդիրների մասին է խոսքը, կառավարությունը թաքցրե՞լ է այդ խնդիրները. «Թաքցնելու ոչինչ չկա… օրինակ ավելացված արժեքի հարկի վերադասման հետ կապված խնդիրներ կան, որոնք ձեւակերպվում են հենց տրանզիտ փոխադրման ժամանակ, երկակի հարկում է տեղի ունենում եւ նմանատիպ այլ խնդիրներ, որոնք այսօր քննարկման հարցերից են: Մենք պետք է խնդրենք, որ դա օրակարգային հարց սարքեն ու սեղմ ժամկետներում լուծում տան»:
Արփինե ՍԻՄՈՆՅԱՆ
