ՀՀ Էկոնոմիկայի նախարարության կազմակերպած արդյունաբերական համաժողովում այսօր ներկայացվեց Եվրասիական տնտեսական միության շրջանակներում անդամ պետությունների արդյունաբերական համագործակցության հիմնական ուղղությունների նախագիծը:
ԵՏՄ արդյունաբերության և ագրոարդյունաբերության նախարար, կոլեգիայի անդամ Սերգեյ Սիդորոսկու խոսքով, նախագիծը ներկայացնում են միության բոլոր անդամ երկրներում, իսկ մինչ այդ հանդիպել են տեղական բիզնես ոլորտի ներկայացուցիչների հետ, քննարկել կարճաժամկետ և միջնաժամկետ ծրագրեր՝ 5 տարվա կտրվածքով:
Սերգեյ Սիդորոսկին նկատեց, որ Հայաստանը, այն պետություններից է, որը միության հետ ընդհանուր սահման չունի, ինչը որոշակի խնդիրներ է առաջ բերում, եւ ինքը հենց այդ խնդիրները լսելու, քննարկելու համար է Հայաստան եկել. «Պետք է հասկանալ՝ ինչ հարցեր կան, որոնք կարճաժամկետ և երկարաժամկետ կտրվածքով կարող են լուծում ստանալ և Հայաստանի տնտեսությունը հասցնել ԵՏՄ-ի տնտեսական պահանջներին»:
Ըստ նրա, ԵՏՄ շրջանակում ավելի հեռանկարային են շինանյութերի արտադրության, թեթև արդյունաբերության, գյուղատնտեսության ոլորտները. «Մենք այսօր հստակ պատկերացում ունենք Հայաստանի արդյունաբերությունից: Պետք է այսօր տեսնել այն ոլորտները, որոնք այս համատեքստում կզարգանան: Օրինակ՝ ունեք լավ շինանյութեր, իսկ այսօր միության անդամ երկրներում օգտագործվում է մեծ ծավալի շինանյութ: Ես կարծում եմ, որ այս ճյուղը Հայաստանի համար հեռանկարային է, և այդ շինանյութը հիմա ներկրվում է ոչ միության անդամ երկրներից: Հիմա պետք է մենք փոխարինեք հայկական արտադրանքով, ինչը կարճ ժամկետում, կարծում եմ, կարվի»:
Կարդացեք նաև
Ռուս պաշտոնյայի համար հեռանկարային է նաեւ հայկական կոշիկի արտադրանքը, տրիկոտաժը, որոնք, ըստ նրա, պետք է զարգացնել և ԵՏՄ շուկաներ հանել: Հարցին՝ ինչ ներդրումների հաշվին, պարոն Սիդորսկին պատասխանեց. «Եվրասիական բանկի հետ աշխատել ենք այդ ծրագրերի շուրջ, որոնք կլինեն ներդրումային միության բոլոր անդամ երկրների համար և կուղղվեն այն ոլորտներին, որոնք հեռանկարային են: Արդեն քննարկվել է նաեւ գյուղատնտեսության ոլորտի համագործակցության մասին: Այս ոլորտի զարգացման համար ձեզ պետք է տեխնիկա, մեքենաներ, տրակտորներ, կոմբայններ, ուղղակի դրանք ավելի երկարաժամկետ ծրագրերի համար են»:
Մեկ այլ հարցի, թե տարվա կտրվածքով տնտեսական անկումը շարունակական կլինի՞ եւ ինչպես ԵՏՄ-ին կհաջողվի փակել տարին, Սերգեյ Սիդորոսկին դժվարացավ պատասխանել, ասաց՝ հույս ունի, որ կհաջողվի խուսափել անկումից. «Չէի ասի, որ միանշանակ անկում կլինի, կան տնտեսական հատվածներ, որոնք աճ են գրանցում և կան ճյուղեր, որոնք անկում են ունենում»:
Ըստ նրա, հիմնականում խնդիրները արտահանման ոլորտում են, բայց այդ բացասական միտումները միայն ԵՏՄ-ի համար չեն. «Խնդիրը գլոբալ է: Առևտրաշրջանառության անկումն այսօր ոչ միայն Եվրասիական միությունում է, այլ նաև այլ երկրներում, այդ թվում նաև մեր այնպիսի գործընկերների հետ, ինչպիսին Եվրամիությունն է, Չինաստանը, Ասիան, մերձավոր Արևելքը»:
Նրա խոսքով, իրենց խնդիրն է վերափոխել ընդհանուր տնտեսության զարգացումը և միության անդամ երկրների համար շղթայական զարգացում ապահովել եւ նկատեց, որ այդ աշխատանքները արդյունք են տալիս: Ու հեռանկարային ճյուղերից թվարկեց ՏՏ ոլորտը, վերամշակման ձեռնարկությունները:
Իսկ ԵՏՄ ընդհանուր տնտեսական աճը, ըստ ռուս պաշտոնյայի, կապահովի միության երկրներից Ղազախստանը 1-2%-ով. « Բելառուսն այսօր ունի անկում նախորդ տարվա համեմատ, ՌԴ-ն նույնպես նույն մակարդակի է»:
Արփինե ՍԻՄՈՆՅԱՆ
