«Զարգացումներ կան, բայց խնդիրը սկզբունքորեն անլուծելի է: Համացանցում հայատառ գրելու տեխնիկական խնդիրներ կան: Որոշ մարդիկ հին անդրոիդներ ունեն, որոնք դժվարությամբ են «մեսրոպատառացվում»: Իհարկե, այդ մարդկանց թիվը գնալով նվազում է, քանի որ սարքերը մոդեռնիզացվում են, բայց շատերը դեռ տեղյակ չեն՝ ինչպես հայաֆիկացնել հեռախոսը»,- այսօր «Peoploemeter» մամուլի ակումբում ասաց տեղեկատվական անվտանգության փորձագետ Սամվել Մարտիրոսյանը՝ խոսելով «Փետրվարի 7-ը համացանցում հայատառ գրելու օր» նախաձեռնության մասին:
Փորձագետի համոզմամբ՝ պետք է իրազեկման ծրագրեր կազմակերպել, որպեսզի մարդիկ սովորեն՝ ինչպես համացանցում գրել հայերեն. «Մի մասը գրում է լատինատառ, քանի որ սխալվելուց է վախենում: Լատինատառով ոնց էլ գրես՝ մի բան կստացվի՝… Մարդիկ գրագետ չեն եւ այդ վախը հիմնավորված է: Շատերը լատինատառի կողմնակիցն են, քանի որ համարում են, որ դա հեշտ եւ հարմար տարբերակ է: Ինֆորմատիկայի դասաժամերին պետք է սովորեցնել արագ տպել, շատերի համար դա խնդիր է: Հայերեն ստեղնաշարը երկու անգամ ավելի մեծ է, քան լատինատառը: Քանի որ մարդը դպրոցում տպել չի սովորել, հետո դա խնդիրներ է առաջացնում: Շատ երկրներում «կույր» տպել են սովորեցնում: Սրանով տարվել պետք չէ, բայց համակարգչից եւ հեռախոսից ճիշտ օգտվելը կարելի է դպրոցից սովորեցնել»:
Սամվել Մարտիրոսյանը փաստեց, որ հատկապես սոցցանցերում լատինատառ հայերեն գրելը որոշակի խնդիրներ է առաջացնում. «Գրելու ընդհանուր կանոն չկա: Օրինակ՝ «Ղ» տառը տարբեր կերպ են գրում՝ «X» «GH», իսկ «Ճ»-ն գրելու շատ տարբերակներ կան: Այսպես մարդիկ իրար չեն հասկանում»:
Կարդացեք նաև
Լուիզա ՍՈՒՔԻԱՍՅԱՆ
