«Այս համաձայնագիրն Ամերիկայի նախաձեռնությամբ եւ Ռուսաստանի համաձայնությամբ ստորագրվել է, հիմնականում, որպեսզի Ասադի զորքերի առաջխաղացումը կասեցվի։ Ասադի զորքերի առաջխաղացումը մեծապես պայմանավորված է ահաբեկիչների դիրքերին ռուսական օդուժի հասցրած հարվածներով»,- այս մասին «Հայելի» ակումբում հայտարարեց թուրքագետ Հակոբ Չաքրյանը։
Ըստ նրա՝ այսպես փորձ է արվում հետագայում Սիրիայում Ռուսաստանի դիրքերի ամրապնդումը կասեցնել. «Թուրքիան զինադադարի նկատմամբ խիստ բացասական վերաբերմունք ունի, որովհետեւ ինքը դեռեւս 2011 մարտից, երբ Սիրիան ներքաշվեց պատերազմի մեջ, մտադիր էր զորք մտցնել այնտեղ եւ չէր էլ թաքցնում դա»։
Հակոբ Չաքրյանն ասաց, որ Թուրքիան չի հրաժարվել Սիրիայի նախագահ Ասադին տապալելու եւ նոր իշխանությունների ձեւավորման նախաձեռնողը դառնալու ցանկությունից. «Եթե թուրքական ուժերի միջոցով Բաշար ալ Ասադի իշխանությունը տապալվի, Թուրքիայի նախաձեռնությամբ պետք է ստեղծվի նոր կառավարությունը։ Նոր կառավարության միջոցով էլ Թուրքիան երկրում կամրապնդի իր դիրքերը եւ հարեւան երկրներում կտարածի իր ազդեցությունը։ Այսպիսով` նա կիրականացնի տարածաշրջանային գերտերություն դառնալու իր երազանքը»։
Նա նշեց, որ Թուրքիան այժմ ցանկանում է զորք մտցնել Սիրիա, սակայն չի կարող միայնակ դա անել, քանի որ վախենում է Ռուսաստանի հակազդեցությունից. «Բացի այդ թուրքական ռազմաօդային ուժերը, ինքնաթիռները Սիրիայի օդային սահմանին 10 կիլոմետրից ավելի չեն կարողանում մոտենալ, որովհետեւ ռուսները զգուշացրել են, որ հենց 10 կիլոմետրից ավելի մոտենան՝ կխփեն։ Դրանից վախենում են եւ այդ պատճառով ՆԱՏՕ-ին եւ ԱՄՆ-ին ուզում են ներքաշել պատերազմի մեջ։ Բարաք Օբաման հայտարարել է, որ պատերազմ չի ուզում, իսկ ՆԱՏՕ-ն հակված չէ այդ պատերազմին խառնվել»։
Կարդացեք նաև
Աշոտ ԻՍՐԱԵԼՅԱՆ
