Երևանի քաղաքապետարանում կայացած աշխատանքային հերթական խորհրդակցության ժամանակ, որը վարել է քաղաքապետ Տարոն Մարգարյանը, մշակույթի և տուրիզմի վարչության պետը զեկուցել է, որ ս.թ. օգոստոսի 4-ին ԼՂՀ մայրաքաղաք Ստեփանակերտում կայացել է «Երևան ՏԱՐԱԶֆեստ 2016» փառատոնը, որը 2-րդ տարին անընդմեջ կազմակերպվում է Երևանի քաղաքապետարանի կողմից «Երևանյան ամառ» եռամսյա ծրագրի շրջանակում: Երևանյան պատվիրակության կազմում Արցախի մայրաքաղաք է մեկնել անհատ ստեղծագործողների, ժողվարպետների, մշակութային համույթների, լրագրողների և մի շարք այլ կազմակերպությունների շուրջ 200 ներկայացուցիչ:
Քաղաքապետը հանձնարարել է ԼՂՀ կառավարության, ինչպես նաև Ստեփանակերտի քաղաքապետարանի հետ շարունակել համագործակցությունը մշակութային և զբոսաշրջության ոլորտներում, նախաձեռնել և իրականացնել փոխգործակցության խորացմանն ու զարգացմանն ուղղված նոր ծրագրեր և միջոցառումներ:
Երևանի քաղաքապետը համապատասխան բոլոր ստորաբաժանումներին հանձնարարել է նաև Արարատյան Հայրապետական թեմի հետ համատեղ նախապատրաստվել օգոստոսի 14-ին կայանալիք Սուրբ Աստվածածնի Վերափոխման տոնի, Խաղողօրհնեքին: Տոնի առիթով միջոցառումներ կանցկացվեն գրեթե բոլոր վարչական շրջաններում: Գլխավոր միջոցառումը, ըստ ավանդույթի, տեղի կունենա Նորք-Մարաշ վարչական շրջանի Սուրբ Աստվածածին եկեղեցում:
Երևանի քաղաքապետարանի տեղեկատվության
և հասարակայնության հետ կապերի վարչություն